張暖雅被翻舊帳闊面平胸
有「D級張馨予」之稱的內地女星張暖雅，近日經常谷胸宣傳電影，由大茄變成焦點，有網友昨日卻踢爆她出道前的平胸照，更有整容之嫌！有傳不和的同片演員何佩瑜（Jeana）和郭穎兒（Celia K.）睇相後大感驚訝，暗寸她樣貌千變萬化！
內地女星張暖雅原本在《一路向西》只屬客串，據知其角色原只有數分鐘戲份，更幾乎沒對白，然而她近日宣傳時當正女主角，人紅是非多，昨日有網友在微博翻其舊帳，上載多張聲稱是張暖雅的出道前生活照，相中人的輪廓跟現時的她有九成似，但下巴、眼角和面形卻有所不同，加上相中人穿上三點式後與她現時的D Cup身材大相逕庭，疑似有所改動！該網友更踢爆她原名張泓紅，以往在內地愛夜蒲和獵仔，先後搭上設計師和富商等，有指她跟《一》片導演胡耀輝過從甚密，故每次有宣傳都預她份兒。
有傳張暖雅太過「進取」而被同片演員排斥，被多位「仇家」昨在電話中寸爆疑似整容，Jeana說：「佢個樣千變萬化，睇落有啲似女版喬寶寶，（指佢個胸假？）如果攝nude bra攝到咁，好想問佢邊度買囉！」至於Celia K.亦有骨地指她想引人注意：「覺得啲相有啲似佢，見到面問下，（宣傳時搶晒你同Jeana風頭？）可能佢資歷淺，要用最突出嘅嘢引人注意，我就唔想啲人用『好大波』形容我囉。」
4吋鬥4吋
前晚張暖雅與女主角Jeana和Celia K.出席首映時，以透視裝谷出4吋事業線搶鏡，Jeana則以真空大露背迎戰，同樣露出4吋事業線。Jeana被問到覺得張暖雅身材是否勁過自己？她說：「都無得比，我係『真』女人。（佢打假波？）唔係，不過我可以介紹專業隆胸顧問，等佢知咩係黃金比例，唔會時大時細，唔會變幻球。」張暖雅辯稱因谷戲才打扮性感：「我無狙擊佢，唔好成日鬥胸啦！」
文：專案組