劉蔚萱黐牆行驚青開工
無綫「神獸天使」劉蔚萱（Jenny）疑遭導演張永豪施虐事件有新進展，據知無綫已鎖定拍片「真兇」，更停廠勸告劇集台前幕後，不能重蹈覆轍。前晚劉蔚萱與張永豪前後腳現身電視城，張永豪直指自己教戲「無問題」，劉蔚萱則見到記者時即嚇得黐牆閃避。
近日有指劉蔚萱拍攝無綫劇《心路GPS》時，未能達到導演張永豪要求，遭對方用盛有田雞的膠袋笠頭及「撼頭埋牆」，過程被拍片上載到facebook才曝光，事後無綫發力追尋源頭。
監製強調不減戲份
據知，無綫翻看當日閉路電視影像，發現有員工拿着手機，對着控制室的現場畫面拍攝，現已鎖定「真兇」為當時待在錄影廠控制室內4名員工的其中1人。由於用手機攝錄劇集拍攝或綵排片段，可能涉及盜竊版權，故無綫曾想過報警追究，但又不希望家醜外傳，才決定息事寧人。前晚無綫高層區偉林特地停廠兩小時召見台前幕後，除表示已知悉真兇外，並呼籲員工以後不要再犯。
事件主角劉蔚萱及張永豪前晚分別回電視城，未知劉蔚萱是否怕再遭照肺，一見記者即露出驚青表情，猶如見鬼，全程更貼牆而行，她對所有提問亦只以「多謝關心」輕輕帶過。至於張永豪則表示未有就事件與劉蔚萱私下溝通，問他以後會否用較溫和的方法教戲？張永豪即斷言：「我覺得冇問題喎！做嘢啫！」
其身旁的監製李艷芳亦強調公司沒有責怪劉蔚萱，不會刪減她的戲份：「又唔係咩大件事！」但直斥公開片段居心叵測：「外間個個都鬧導演太過分，但大家唔了解全部先咁評論，咁講唔公平！」
文：影視組