諸葛生日 收老公3大驚喜
「薛王妃」諸葛紫岐婚後首個生日，老公薛嘉麟即送上三個驚喜：足金玫瑰、五十日愛之旅及在生日會上即場獻唱，做足廿四孝老公，出盡法寶冧老婆。
諸葛昨日29歲生日，其母為她在北京舉行迷你生日會，老公薛嘉麟亦有陪同左右。
金花加假期
問諸葛老公送了甚麼生日禮物？她開心地說：「老公送咗一支金玫瑰花畀我，其實我唔鍾意收花，我只鍾意種喺泥土嘅花，我覺得啲花摘落嚟好快謝，好可惜，所以我喜歡氣球，氣球冇咗氣都可以吹番再用。但老公話一直想送花畀我，所以特別訂咗支金花，話『呢隻唔會謝，唔會變色。』」
已有一段時間不在港的諸葛表示外遊五十日，也是老公送的生日禮物，她說：「我唔喺香港一個月二十日，同老公去旅遊，不過唔係去咗好多地方。（積極造人？）我唔想成日話快啲生，生BB要講緣分，隨緣，依家過住二人世界都好開心，唔會畀壓力自己。」
昨晚在京舉行的生日派對，是媽咪一手籌辦，諸葛說：「我冇諗過媽咪會幫我搞到咁大，叫晒啲親朋好友，除咗婚禮當日，平時好少見到佢哋。（老公喺度？）當然喺度。（佢會唔會即場獻唱畀你聽？）應該會，今次唔係好多人，佢飲多兩杯應該會唱。」提到生日願望她說希望家人身體健康！
多謝母安排
昨日諸葛在微博上載了生日派對的照片，場內布置如童話故事的公主派對，有玫瑰花形狀的生日蛋糕，以及麵包超人造型蛋糕仔，還有無數鮮花，諸葛留言說：「媽媽精心為我布置的生日會場，好棒喔！謝謝我親愛的媽咪，感謝你對我從小到大無微不至的關心。」薛嘉麟亦在微博上載與太太的合照，並寫道：「生日快樂！日日幸福！分分秒秒甜蜜！」
文：名人組