徐濠縈：使老公錢有乜問題?

我成日畀人批評係大花筒，淨係識使Eason錢，我個人好衰，只會着靚嘢喺身，唔靚唔會逼自己着，我認我係鍾意買衫，但我鍾意買嘢又買得起，老公又冇投訴，唔覺有乜問題。依家我有自己嘅時裝生意，有自己同老公張信用卡，我鍾意用邊張都無問題！

我初初唔敢開時裝店，因為冇經驗唔敢博，有段時間做過時裝buyer、PR同styling，最終都係發覺唔啱我，其實我咁嘅性格，點可以幫人打工？一來我做過娛樂圈拍過戲、二來我又好鍾意話事，做形象指導要我成日去借衫，攞住一袋二袋衫覺得冇乜大志，既然係咁不如去做生意啦！於是就同當時做緊時裝嘅好朋友Dorothy喺2009年開樓上舖。

投資六位數

其實開舖錢都係我嘅私己錢，唔關Eason事，我攞嗰舊錢只有六位數字，自己畀得到，我唔明啲人話佢開水喉畀我囉！就算佢畀錢支持我又有乜問題，我又唔係開大型嘅時裝連鎖店。我開時裝店係為興趣，賺到少少我都已經好開心，我唔會有壓力，邊做邊學當人生一個經驗。

我啱啱學人去歐洲入貨，都食過閉門羹，當然被拒絕係唔好受，我覺得唔緊要，當日挫折令我變得更爭氣，我冇放棄過，後來我成功咗。做生意同做人一樣，要堅持自己信念，唔好成日埋怨，令自己做得更好。

唔想做潮媽

我對潮人稱號唔鍾意，型人我就明，叫我做潮媽仲驚。我個人好鍾意變，乜都敢試，我好在乎自己點睇自己，你哋話我好成功，但我覺得自己唔算有乜成就，最重要係過程開心又有人欣賞同賞識。

我依家好享受忙碌過程，不過家庭比事業更重要。啲人成日問Eason係咪好忙先冇時間「做人」，其實唔係佢冇時間，我三十幾歲人先至搞時裝生意，事業啱啱起飛，一佗B就飛唔到，好彩Eason好尊重同明白我。

口述：徐濠縈

筆錄：名人組