祖藍轉型 惹北嫂圍拍
擅長反串女仔的王祖藍，昨日以型仔造型在金紫荊廣場拍劇，大批強國人圍觀並舉起手機追影祖藍，有師奶更說：「王祖『蘭』呀！成日扮女人嗰個呀！都幾得意呀！」在場工作人員亦有樣學樣，稱呼祖藍為「祖蘭」，場面搞笑。
王祖藍、郭晉安、萬綺雯、王菀之（Ivana）等昨晨在金紫荊廣場，為新劇《老表，你好嘢！》拍攝一場帶領強國小朋友玩樂戲份，吸引大批強國人圍觀，眾人眼見有明星睇，即使在烈日下乾煎至汗流浹背也在所不計。期間有師奶認出祖藍，便向旁邊女友人謂：「哎呀！呢個咪王祖『蘭』，成日扮女人嗰個呀！都幾得意！」不過正在投入角色的祖藍卻未聽進耳，反而有工作人員聞言即忍俊不禁，還「接力」該師奶叫「祖蘭」，認真抵死！
身兼創作該劇古仔及演員的祖藍，大讚同事犀利，將其故事化成20集的劇集，而且全劇演員亦有畀意見，盡顯愛的一面。談到徐濠縈於微博罵強國人冇禮貌而遭16萬網民圍插，祖藍呼籲大家以和為貴：「我哋好明白觀眾好鍾意我哋，但同時希望得到尊重，好多時佢哋唔講聲就影你相，感覺好似畀人侵犯咁。」
萬綺雯獲安仔照顧
首度拍攝無綫劇的萬綺雯，透露劇中與安仔不乏對手戲，她謂：「初頭拍嗰時唔係幾適應，佢好照顧我，幫我好多。」至於處女下海拍劇的Ivana，自爆拍劇時的蝦碌事件：「我唔識就鏡頭，有次以為自己演得好好，點知cut機後，導演話我背住鏡頭囉！好好笑，所以我都慢慢適應中。」
文：影視組