徐濠縈有眼不識Scott Schuman
時裝達人徐濠縈（阿徐）向來深得各大品牌喜愛，最近美國時尚休閒品牌J.CREW盛邀世界各地十個不同界別的藝術人與時尚人進行拍攝，當中有阿徐外，還包括麥浚龍哥哥麥浚翹（大寶），這個名為「Hello World」的特輯，由著名攝影師兼blogger Scott Schuman與Garance Dore負責，其中Scott更來港為阿徐影靚相。
阿徐說：「其實我哋係第二次見面，但佢唔記得我，皆因佢每日影咁多街頭相，點會認得我！」續解釋說：「有次去巴黎公幹，去showroom睇衫後就喺附近餐廳飲嘢，當時好攰，個樣烏歪到不得了，有個外籍男人問我可唔可以影相，嗰時我唔知佢係邊個，求其話事但；之後就有好多朋友打電話畀我話喺Scott Schuman嘅blog度見到我張相，我仲唔知發生乜事，問點解會有我張相，我一睇之下，原來喺巴黎幫我影相嗰個外籍男人係Scott Schuman！如果我知係佢，會執番好個靚樣、梳番個靚頭先畀佢影呀！」
問到拍攝趣事？她說：「我好黑仔，一輯街頭相影一、兩個鐘可以收貨，但我影嗰日落足全日雨，朝九影到晚五，仲要擔遮影，不過最後出嚟效果好靚！」她又透露有機會與品牌合作，現在初步洽商中。