祖兒又錫又剝 唔用替身
樂壇天之驕女容祖兒（Joey），在英皇電影《DIVA華麗之後》演繹一個當紅歌姬與失明按摩師之間的愛情故事，真愛突破了身份差異。另她大爆在戲中又錫又除，本來有替身的她，親自拍番被胡歌推油一幕，大讚他推得舒服！
Joey在英皇電影《DIVA華麗之後》中，雖與劉浩龍有不少對手戲，但談情對手卻是內地演員胡歌，不過「龍兒戀」既是全城熱話，難免成為焦點，Joey表示：「我哋拍戲好畀心機，做乜成日講住佢（劉浩龍）？戲中我又錫又除，本來預咗個替身畀我，我都親自拍番推油嗰幕，因為胡歌推得幾舒服！我冇票房概念，但我冇得輸，因為都冇贏過。杜汶澤話我投入真感覺做就好睇，我咪套用咗真實中含苞待放嘅愛情觀。（介意焦點落喺你同劉浩龍度？）冇去諗，我相信公司了解我做事方針，使乜出到花邊新聞。（拍戲賺埋段感情？）唔係，係賺咗同成個劇組嘅感情。」
宣傳焦點不變
而身兼監製的杜汶澤則以滴水不漏的行政人員口脗說：「問我劉浩龍冇戲份時有冇借啲意同Joey呃水吹？我點答呀？（佢哋廣州外景有冇失蹤？）冇留意！（預告片冇劉浩龍免觀眾焦點錯放？）剪嗰時都未發生（龍兒戀），如果擺劉浩龍同Joey專訪，媒體焦點實唔同，但我哋會照番原來嘅宣傳安排，唔會刻意改變。」
着火辣Bra Top
另外，祖兒早前穿上性感火辣Bra Top及搽上鮮紅色唇膏拍攝國語新專輯《Moment》封套，展露美好身段及修長美腿，專業的祖兒更應國際級攝影師陳漫要求將美腿凌空伸直，祖兒笑說：「簡直挑戰人體極限！」
採訪：影視組
攝影：劉智源
場地：The Mira