黃心穎C奶出擊 朱晨麗爆乳迎戰
無綫小花朱晨麗、黃心穎與唐詩詠等，昨悉心打扮亮相無綫台慶頒獎禮紅地氈，為了靚靚，各出奇招。朱晨麗特登把晚裝裙改細，營造「爆乳」效果，為免爆衫連抖氣都唔敢太大啖！而穿tube dress大騷「Ｃ奶」的黃心穎及穿上白色喱士裙、真空上陣的唐詩詠，都令人眼前一亮！
無綫台慶頒獎禮昨晚於電視城舉行，一眾花旦盛裝打扮於紅地氈上爭艷鬥麗。數到全場最性感，非朱晨麗莫屬，她穿上肉色低胸裙，谷盡三吋事業線，big爆全場！她表示設計師前晚才改細條裙，笑稱腰間緊到不敢「抖大氣」，又打趣道：「我唔可以大啖氣呼吸，今晚要好Lady咁呼吸，因為我怕爆衫！」
而同樣晒「胸」器的黃心穎，以火紅tube dress大拋「C奶」，跟地氈撞色的她笑稱刻意「黐地」，營造「增高」效果。談到跟緋聞對象王浩信翹手出場，問到性感打扮可有嚇倒對方？心穎笑言：「佢應該睇慣，去年都同佢一齊行，今日好多女藝人都好性感。」
洪永城獨享齊人之福
至於穿上白色喱士裙的唐詩詠更真空上陣，中門大開露半球之餘，後面更大晒白滑玉背，噴血指數爆燈！與男友洪永城、黃翠如受訪時，翠如突然脫去手上戒指，更向洪永城和詩詠抵死謂：「好啱你哋呢個場合。」兩人隨即尷尬彈開，男方又扮嬲笑稱：「你破壞咗嗰節目。」洪永城又在三催四請下才肯企定定合照，相反女友詩詠則大方得多，合照時更主動翹實男友。事後，洪永城否認感尷尬，問到為何不接下翠如戒指？他即大耍太極：「佢隻戒指咁名貴，聽講成億，萬一跌咗我賠唔起！」問到有否獲男友批准穿着性感？詩詠說：「冇，條裙今朝先喺以色列運到，見到真身都冇得縮沙。佢淨係望咗一望話『咁呀！』冇特別評語。」
高Ling密實遮「線頭」
反而向來形象性感的高海寧（高Ling）卻毫無睇頭，穿上紫色晚裝的她胸前以黑色喱士遮「線頭」，相當失色！她解釋是聽從經理人要求穿得高貴點：「最緊要靚，今晚要坐好耐，所以着得舒服啲。」
文：影視組