莊思敏：會為老公拆彈
莊思敏個性坦白率直，好似當年承認隆胸，敢做敢認令人刮目相看。但早前有一名內地隆胸女子以母乳餵哺孩子，導致嬰兒腦癱，禍及後代，人心惶惶。但她未有被此事嚇怕，而打算拆彈，但卻願為未來老公的家人而妥協，原來她亦有小女人的一面。
我做手術之前已經問清楚風險，我係用矽袋隆胸嘅，對將來生ＢＢ唔會有影響。就算我用母乳餵ＢＢ都冇所謂嘅，因為所有化學物質都喺個袋裏面，唔會滲漏，唔會影響到乳腺。不過其實我覺得一個媽媽餵唔餵母乳，係要視乎個人嘅健康狀況決定。好似我媽咪咁，佢都係唔夠奶o架，所以同有冇隆胸無關。我個人就覺得餵唔餵人奶都冇所謂，到時會聽醫生建議，睇吓點做好啲，不過暫時就冇考慮過拆彈。
朋友好奇摸胸
但我都有擔心過，男朋友嘅屋企人會接受唔到我隆過胸。但係我深信人品係重要過我有冇做過手術嘅，如果我哋相處融洽，我諗佢哋都會接受嘅。但係假如我同男友到咗談婚論嫁嘅階段，而佢嘅屋企人又真係接受唔到我隆胸嘅話，我都會考慮為咗佢哋而拆彈。
到依家我仍然覺得隆胸係一個正確嘅決定，雖然有人會好無聊咁喺我微博、Instagram度留言，話我「打假波」、「人造人」咁，不過都唔理得咁多。但亦有正面反應，試過喺街有路人會走嚟同我講「你認隆胸，好大膽呀！我想問吓你痛唔痛o架？」有啲唔係好熟嘅圈中朋友，會好好奇咁問我「可唔可以摸吓呀？」又或者問一啲深入啲嘅感覺。當然最重要覺得舒服，但亦唔會鼓勵或支持啲人去隆胸。
口述：莊思敏
筆錄：名人組