晶晶紅噹噹 預習做新娘
霍震霆兒子霍啟剛與跳水公主郭晶晶，據知婚期已定在年底舉行。而啟剛昨被追問正式日期時亦表示：「要保持神秘感。」前晚及昨日完成活動後，啟剛都急不及待與晶晶撐枱腳，認真煙韌！昨晚啟剛更陪住一身紅旗袍打扮的晶晶出席海洋公園活動。
前晚霍啟剛罕有地與女友郭晶晶一同以黑色情侶裝出席公開活動，二人拍拖以來一直都表現低調，自從傳出兩人婚期後，「剛晶」已放開顧忌，更經常被拍得出雙入對。前晚二人就高調地出席活動後，兩人一同離去，啟剛大方向記者揮手，晶晶就保持一貫的低調不語，然後同到灣仔君悅酒店晚膳，抵埗後，晶晶害羞微笑，而啟剛依然大方揮手，一同步入酒店撐枱腳。
喼弗準新郎
至昨早啟剛換上一身輕便裝，以本會副主席身份出席「香港青聯小型足球賽開球禮」活動，記者追問他的「十月婚期」？他聽罷反應甚大否認說：「點解會咁問？邊個講o架？你哋會知道多過我。（咁係咪十月？）唔講住，今（昨）日係踢波活動，（咁係咪今年內？）冇講，（你哋有計劃？）唔講啦，遲啲先！」他更笑謂要保持神秘感，不過據悉二人已定於年尾拉埋天窗，至於實則日期則還要待定。現場所見，啟剛清減不少，他透露近日積極做運動，他說：「我好多年冇踢波，踢波冇細佬咁叻，我依家打網球同做gym，加上均衡飲食，又飲少酒同果汁！」看來準新郎積極keep fit迎接年底的人生大事。
煙韌撐枱腳
活動完畢，啟剛隨即登上一架七人車，到大坑中華遊樂會，相信他爭取時間與晶晶撐枱腳。午膳後二人換過裝束，繼續孖公仔現身晚上的海洋公園保育活動。晶晶穿上一身紅色旗袍，而啟剛則穿上黑西裝配牛仔褲，甚有新郎新娘feel。起初「剛晶」略顯避忌，其後都大方坐在一起。
文：名人組