劉心悠險葬台灣大地震

印尼剛又發生大地震，鄰近國家也發出海嘯警告；不少名人明星也曾在外地遇過驚險事，台灣女星劉心悠十年前在老家遇上八級大地震，朋友家更震到倒塌；而傅嘉莉及呂慧儀也試過在日本經歷地震，嚇到心驚驚！

地震後餘悸劉心悠：「十年前喺台灣遇過大地震，強度有七、八級，整棟大廈停電，不停有尖叫聲。當時驚到行唔到去媽咪爹哋間房，惟有匿喺被窩裏面。嗰刻我仲諗住死梗，之後仲持續餘震24小時，四周牆身都出現裂縫，有朋友成間屋倒塌，被政府安排入住臨時庇護所，依家聽到地震新聞都會好心酸。」

屋企感搖晃　蔡加讚：「之前喺洛杉磯遇過地震，不過唔算嚴重，只係震咗一陣，屋企枱同櫃都係咁搖，啲嘢跌晒落地！」

飛機急降陳鈺芸：「有次同屋企人搭飛機，起飛唔夠五分鐘就話架機有事。大家都好擔心，但好彩飛得唔遠，返番機場平安降落，真係有驚無險！」

滑雪險撞柱童愛玲：「當年有一場戲，喺北京滑雪場取景，入夜後啲雪開始融，一滑落去就停唔到，最後仲撞咗去攝影機度，而隔籬就係柱。工作人員立刻衝上前扶我，好彩一啲事都冇！」

傅嘉莉	呂慧儀（左）、吳鎮宇

避過海嘯陳嘉桓：「有次同媽咪去泰國自由行，本來諗住去芭堤雅，但怕唔識路，最後只去曼谷。飛機上人人都接到親友電話，原來當日沿海有海嘯，真係好好彩我哋唔識路咋！」

出門發燒徐靖雯：「試過飛去峇里途中發燒，仲要轉幾次機。峇里已經好熱，差啲暈低！最後去到峇里睇醫生，希望唔好出門先病。」

兩度撞車馬詩慧：「我試過喺泰國同內地撞車，一次做嘢、一次同屋企人去旅行。兩次都係架車凹咗，個人冇事。其實唔係好驚，不過同小朋友一齊嗰次要不斷安慰佢哋，但係同同事嗰次就喺度話『有冇搞錯呀，咁樣揸車！』」

首遇地震傅嘉莉：「有一次我喺日本遇到六至七級地震，第一次感覺到地震嘅感覺，真係好驚，唔知應該搵地方匿埋定走出去，最後我同其他模特兒朋友跑咗出去大廈外面。」

粉絲撞車吳鎮宇：「自己就冇試過特別驚險嘅事，反而係有一次喺泰國拍戲，有個細路掛住睇我哋拍戲，冇留意之下畀架車撞到，冇咗個眼珠，呢件事令到我一直都好唔安樂！」

震到熄燈呂慧儀：「兩年前同朋友去日本，喺酒店感覺到地震，成棟大廈喺度搖，所有燈都熄埋，嗰陣都幾驚！」