蔡穎恩陳嘉寶學花式溜冰話咁易
溜冰是一項集力量、耐力、速度、協調、柔韌、靈活、平衡、優美、穩定於一身的運動，試玩後的蔡穎恩（Evelyn）與陳嘉寶（Anjaylia）都認為「易學難精」，不過只要夠膽，夠勤力，要玩到花式溜冰絕不是難事！
蔡穎恩與陳嘉寶早前到「又一城歡天雪地」試玩溜冰，事前牙擦擦地表示it's so easy，但落場站在冰上就腳震震，每溜出一步都心驚驚，Evelyn說：「溜冰係一項易學難精的運動，我小時候都學過，但都交番晒畀老師！」Anjaylia也認同：「溜冰係一項好姿態優美運動，今次係我第一次玩，起初以為好易但實際唔係，只要一驚就會失平衡，我都差點跌倒。」
溜冰不僅能增強人體的平衡能力、協調能力及身體的柔韌性，同時還可增強心肺功能，Evelyn與Anjaylia不約而同地說：「溜冰可以充分表現出優美線條，而且扭動強度較大，令全身擺動，可達到修身之效。」Anjaylia說：「溜冰係標準有氧運動，可有效清掉脂肪，而唔係水或糖，同時可以鍛煉肌肉修飾身段。」
問到學懂溜冰的竅門？Evelyn說：「膽要大，只要你一驚跌同撞，就會好易失平衡而跌倒。」Anjaylia加以補充：「係呀！不過都要勤力練習，只要肯付出，世上無難事，要學識花式溜冰都話咁易！」
高級溜冰教練醒醒你：
有膽量，不怕跌 。
懂得放鬆，學會平衡。
話你知：
三歲起可以開始學習溜冰。
一般學習一至兩年，學會了向前，向後，向左，向右，甚至轉彎，便可以學習花式溜冰。
採訪：劉慰思
攝影：沈健程