Stephy爆煲 當傅穎冇到
十年人事幾番新！源自Cookies的區文詩（Angela）跟鄧麗欣（Stephy），友情經得起3650天的考驗，惟九餅女匆匆一年就解體，回望過去，兩人自揭瘡疤，後悔當年未夠努力，Stephy還向好姐妹吐露心聲，坦言介意跟傅穎（Theresa）比較，Angela亦替Stephy的變臉傳聞抱不平。
S=鄧麗欣 A=區文詩
A：10年真係好唔覺，你會唔會有時諗番起以前？
S（感慨地）：我成日都諗，係好鍾意回憶嘅人，覺得好珍貴，所有嘢好似好偶然，但又安排好。
A：咁你覺得以前Cookies係開心嘅多還是唔開心嘅多呢？
S：開心，其實只有1年好短時間，當時我哋太細個，未識得驚同有壓力，只係識得食、玩，都有做嘢嘅，嘻嘻，嗰種開心嚟自放鬆；（嘆一口氣）但我成日諗番都有少少後悔，我覺得我哋可以做得更好，公司未必照顧到我哋9個，好多時要自己照顧自己，但咁細個又乜都唔識，好多嘢都忽略咗。
A（自責）：我後悔當時掛住拍拖，拍到癲咗，夜晚都出去蒲，好後悔自己唔爭氣，因為我當時好衰，好唔keep狀態好肥，化妝又求其，頭又唔整，制服又唔洗，嗰時好似冇乜靈魂，依家對比番就知以前做得好差，近年我學識唔好太hea。
S：其實肥唔止你，Miki都脹o架，Gloria唔肥咩，我哋9個都係過重，一上車就食，一break就食，大班女仔好開心，變咗唔係好keep狀態，我好後悔呢樣，我覺得我哋可以更好，呢啲要學習，新入行唔會諗得透徹，我都係呢幾年先開竅，聽好多前輩說話，唔好睇一個好簡單訪問、記者會，你都要做功課。
唔齊腳傳不和
過去，Stephy的名字永遠跟Theresa放在一齊，外間不停拿兩人比較，Angela都替好姐妹無奈！
A：咁你又介唔介意入行到依家，都有人將你同Theresa比較呢？
S（坦白地）：曾經會介意，因為自己性格問題，由細到大就算阿媽話：「你睇吓隔籬張太個女幾叻。」我都唔鍾意，我覺得每人都有自己嘅優、缺點，既然我係你個女，我都有自己優點，唔好成日將人哋嘅優點擺落我身上，比較（同Theresa）有時都會介意，但依家睇到好輕，覺得人哋要寫乜，自己控制唔到，惟有唔睇囉。
A：大家將組合睇得太神話化，以為一定勁好朋友，其實組合即係同事之嘛，9個唔同人擺埋一齊，總有一啲friend啲，有啲唔係咁friend但未至於係敵人，我哋解散咗就好似辭職咁，有啲同事約出嚟食飯，都唔會約晒全公司o架，總係會約某幾個，所以就出現好多不和、比較嘅新聞。
S：新聞嘅嘢係滾出嚟，個球愈滾愈大，變咗誤會愈嚟愈多，真係好奇怪嘅事，多謝你一直出嚟撐我，好多時我都唔知，都係聽其他朋友講。
A：總係是但一個人有嘢發生，就要問另一個人回應，咁係一世喎！我哋已經去到唔溝通呢啲嘢，唔值得去提邊個又同邊個傳不和。
S：大家心照，新聞係點唔需要再去探討。
十八變冇整容
女大十八變，最近Stephy被指跟吳雨霏（Kary）驚變孖女，Angela就挺身力證兩人都冇整容。
A：都有雜誌話你同Theresa似，但我覺得完全唔似。
S：我同Kary似啲，亦有人話我同Miki似，其實化妝都好大影響，我同Kary同一個化妝師，所以可能有時化埋同一個樣。
A：我可以證實你哋冇整容，我哋keep住見，整咗要時間療傷，腫口腫面實覺，不過我覺得Kary真係靚咗。
S：女大十八變，啲雜誌報紙一講整容就攞番Cookies最初出道啲相，頭又好似啱啱瞓醒咁，個妝又未化完，而且仲有baby fat，講真Kary當時16歲，佢啲baby fat多到不得了。
A：諗番都幾恐怖，時間飛逝。
S：我冇乜所謂，年齡睇得好開，要做到呢個年齡嘅嘢已無憾，自己仲有好多目標，但呢個階段對得住自己，過到想過生活，做到自己鍾意嘅嘢，生活又開心，我覺得好幸福。
A：我哋性格都係10年前冇乜變，所以啲人話娛樂圈好複雜，其實係睇自己。
S：呢行好難識到真心朋友。
後記：一哭釋前嫌
Angela和Stephy相識十年，兩人性格互補不足，屬於行動派的Angela，通常決定了就去做，相反Stephy就比較冷靜，原來，她們曾因一位朋友的離間，令友情出現裂痕，當真相大白後，Stephy就親去找Angela解釋誤會，相擁而哭，今日重提舊事，兩人都大笑不已。
採訪：音樂組
攝影：黃叔榮
場地：Double Second Cafe
Stephy 髮型：Vince Pang@Colpo tst 化妝：Cyrus Lee@Beautytech
區文詩 髮型：Sue Cheung@Hair Corner 化妝：Michelle Ho