Eason急召老婆倫敦造人
圈中生仔潮流浪接浪，向來恨生仔的38歲陳奕迅（Eason）日前在街上每見到有BB經過，都流晒口水上前逗玩。據知日前身在倫敦開騷的Eason，跟公司攞幾日假期，急召老婆飛英千里炮製BB，希望一索得男。
Eason跟阿徐結婚6年，育有一個寶貝女兒康堤，由於前幾年阿徐忙於建立自己的時裝生意，身為天王的Eason更加是忙到冇時停，兩人完全沒有時間計劃再生B。直至最近，眼看康堤已經快8歲了，兩公婆頻頻露口風想追多個，為康堤添一個弟弟。
巴黎無果 再接再厲
雖然陳慧琳、楊千嬅、蔡一智等均趕及生龍B，不過，今年Eason為巡唱飛勻世界各地開騷，在香港的時間根本不多，早前阿徐38歲生日要在巴黎出席時裝周，Eason惟有移船就磡飛花都，為老婆炮製驚喜生日，可惜在浪漫花都下，兩人都是造人失敗！據知阿徐的肚皮至今仍未有聲氣，目前Eason身在倫敦為23日（當地時間）的演唱會做準備，消息指他特別向公司請了幾日假，完騷後留在倫敦和老婆努力造人，希望一擊即中。
日前，本報發現Eason跟組合Swing成員Jerald現身筲箕灣的冰室用膳，兩人離開時，在門外見到有一男子孭住BB，Eason即慈父上身笑騎騎，不停逗BB玩又跟「孭帶男」吹水，明顯恨再做老竇恨到發晒燒！
撇低康堤 二人世界
同日晚上，本報在中環見到阿徐跟女兒康堤，好友黃偉文及其同性醫生密友食完晚飯離開，當時還未夠8點，阿徐已急不及待返家會老公，不知是否爭取時間趕回去跟Eason閉門密密造人！據知，阿徐為了炮製健康BB，已經減少了應酬，平日亦盡早回家休息調理身子，還下令要Eason減肥，以最fit身體製造精靈BB。
Eason已於前日出發飛往倫敦，據知阿徐就遲一、兩日才會合。本報致電Eason，他大方承認老婆會來倫敦會合：「仲有好多朋友嚟捧場，好似梁漢文夫婦、黃偉文，不過囡囡要返學嚟唔到。」問是否跟老婆趕製蛇B？他笑說：「龍B唔知趕唔趕得切啦，希望大家畀啲時間同空間我，我喺倫敦會努力做騷同造人，如果生蛇仔，咁我今年要勤力搵3億！」
文：音樂組
攝：追蹤組