港姐搞真人騷 趕絕整容怪
無綫節目《盛女愛作戰》有回響，連帶今年港姐都照辦煮碗以真人騷方式炮製！為令《港姐愛作戰》搞得有聲有色，無綫製作費加碼，落實豪擲五至六百萬製作費，不過會搵定專家杜絕整容分子。
《盛女》掀起全城熱話，8月舉行的港姐選舉亦要「抽水」，以真人騷方式炮製《港姐愛作戰》，港姐大會統籌余詠珊昨日接受本報電話訪問時說：「今屆港姐會食番《盛女》條水，仲會以素顏look做噱頭。」她說不怕候選佳麗素顏look趕客：「少女十八無醜婦，其實方向似《American top model》，人哋都冇乜化妝。」余又指已搵定專家杜絕整容分子：「可以接受美白針或botox，但隆胸同整鼻就不能接受！」
今年獎品加碼
由於今年是港姐40周年，余詠珊指無綫已落實豪擲五至六百萬大搞，更不排除之後會加碼：「今年獎品好吸引，冠軍有一年機票任飛，又會帶班女仔去英國大型百貨公司Selfridges拍嘢、食皇室御用晚餐，同去泰國享受七星級spa。」
為了造勢，十位歷屆港姐呂慧儀、高海寧、周家蔚、林莉、許亦妮、朱希敏等前晚出席港姐最後招募活動，行catwalk展現美態。當中以已婚的呂慧儀及周家蔚最搶鏡，因她倆身形「變幻莫測」。
慧儀想拍裸照
之前因肥胖盛傳懷孕的呂慧儀，前晚卻fit到漏，她坦言全靠家有地獄教練（老公）：「我想食都冇得食，佢覺得我肥會影響image。（暫不計劃生育是否想努力賺錢？）生仔可能搵得仲多，你睇朱茵同Paul（黃貫中），八百萬喎！」她更笑言想效法朱茵拍懷孕裸照：「先生唔知會唔會，佢啲肉好貴。」
同樣盛傳有孕的周家蔚則愈見發福，孕味甚濃，她坦言蜜月返港後肥了六磅，做完運動更多了一磅，她笑言有朋友追問她是否懷孕：「邊有咁快，喺塞班嗰時係不設防，不過返嚟太忙，冇時間。」她又笑言拍修身廣告都要執相。
文：影視組