鄭嘉穎得個chok字 被封橡膠穎
貴為視帝的鄭嘉穎向來惹火，近日遭素有積怨的無綫前藝員冼灝英公然插爆，直指他性格有缺陷，嘉穎更被網友封做「橡膠穎」，日前他即抽空往洗牙擋煞，對於被冼灝英力斥，嘉穎反擊說：「熟我嘅人知道係點就已經OK。」
鄭嘉穎自從榮升無綫視帝後，是非緋聞接踵而來，除了傳他狂追劉心悠外，最近其主演的新劇《拳王》剛出街，外界口碑已相當不俗，不過負面新聞一樣很多，繼被指劇情抄電影橋段後，近日鄭嘉穎更遭為該劇擔任動作指導的「冼師傅」冼灝英公開力斥，形容他戲雖好，但太自我不懂得尊重人。
返港洗牙擋煞
據知二人在拍攝《拳》劇期間已不咬弦，令冼師傅兩位有份演出的徒弟黃浩然與黃澤鋒，與嘉穎私底下亦冇偈傾，直至冼師傅最近過檔王維基，在沒有顧慮下自爆昔日恩怨。另外，有網友批評他在《拳》劇演出得個chok字，更惡搞封他做「橡膠穎」。
日前嘉穎抽空回港宣傳，完成後未有爭取時間返家休息，反而發現他去了銅鑼灣睇牙，順便洗埋棚牙，未知是否近來負面新聞太多，洗牙擋下煞。他說：「人行得多都要修理下啦，牙都一樣。」前一日他還往髮型屋剪髮，實行保持靚仔樣最重要。對於冼灝英公然開名指摘，昨日身在內地忙於開工的鄭嘉穎在電話中表示：「唔同人有唔同睇法，唔識我嘅人對我有誤解，唔會多作評論，總之，熟我嘅人知道係點就已經OK。」
《拳王》監製羅永賢表示有看過報道，對冼灝英評嘉穎為人之字眼過分「嚴厲」，他說：「冼灝英義務幫我哋個劇做泰拳顧問，大家當然有唔同意見，不過拍攝都好順利，至於師傅係有自己一套感覺表達，但嘉穎份人對工作係好緊張，拍攝時唔會從容，好繃緊，呢種性格你話好又得唔好又得，不過佢哋討論過後，嘉穎都會照做，今次我睇到冼師傅個說法，字眼上係嚴厲咗，我都會搵佢了解！」
樂易玲維護愛將
跟冼灝英學武的黃澤鋒當然撐師傅，並指嘉穎性格自我：「拍攝時我冇聽到佢兩個有拗撬，（覺得嘉穎份人點？）平時點吓頭啦！佢都係自我o架！平時我哋少接觸，碰面就係打擂台，因為劇中我哋係對立！」
視嘉穎為「愛將」的無綫高層樂易玲昨日對冼灝英鬧爆嘉穎坦言：「習武嘅人係直腸直肚！」及後樂稱黃浩然與師傅冼灝英有默契是毋庸置疑，相反嘉穎非習武之人，要他短時間演拳手「形神俱備」並不容易：「嘉穎始終傷過，對所有動作都要清楚了解，唔似得浩然同師傅咁有默契！」
文、攝：追蹤組、影視組