楊愛瑾忟男友 打牆痛入心
每個人都總有失控的時候，平日在鏡頭前儀態萬千的藝人，鏡頭後總有放縱的時刻。楊愛瑾曾與男朋友嗌交，嬲到打牆發洩；丁子高被好友出賣，憤怒得把門也打爛；而松岡李那與男友嗌交時，忍不住兜巴星對方，卻被男友扯頭髮還擊，弄得兩敗俱傷。
《鞋履活動》
知痛即收 楊愛瑾：「我十五、六歲嗰陣，同男朋友嗌交，覺得好嬲，喺屋企打牆發洩。雖然冇打到流血，但石屎牆打兩、三下已經好痛，所以就收手。」
最憎畀人寸 Alice B.：「如果有人唔尊重我或者講嘢寸我，我都會好嬲。我多數都會喊或者大叫，之後係咁打嘢，好似打枕頭咁，有陣時會打boxing嚟發洩。」
被屈即走 羽翹：「喺十二、三歲嗰時，同媽咪喺餐廳嗌交，佢話張圖書證喺我度，但其實喺佢度。我覺得畀人冤枉，所以就將成張枱嘅嘢推冧晒之後走咗。」
打爛門口 丁子高：「以前我喺上海讀中學嗰陣，有一次我覺得朋友出賣咗我，嬲到一手打爛咗宿舍道門。之後學校聯絡家長，最後仲要賠錢。」
《時裝新店開幕》
粒聲唔出 唐貝詩：「如果同男朋友嗌交通常會唔出聲，不過其實我都好幸運，因為一直以嚟男朋友都好錫我，唔會令我好嬲！」
嗌交狂鬧 黃芷晴：「同男朋友嗌交試過最嬲時會大聲鬧對方，對方通常唔出聲，不過後來自己諗清楚，覺得嗌交時都係雙方冷靜分開吓會係最好嘅方法！」
兜巴星埋去 松岡李那：「我試過同男朋友嗌交時嬲到一巴打過去，對方都有還手，但佢又唔可以打我，惟有扯住我啲頭髮，都幾痛o架！」
《保護動物活動》
掟到地凹 林莉：「如果真係好嬲我會掟嘢發洩，有次我掟自己鍾意嘅嘢，竟然掟凹咗個地板！」
《護膚品牌活動》
男友怕怕 汪圓圓：「其實唔鍾意嗌交，最激嘅話咪會喊囉。我細個唔會喊，反而依家會，可能唔識表達。如果我喊嘅話，男朋友蔡加讚都會驚，因為佢怕女仔喊。」
自己去旅行 諸葛紫岐：「試過同男朋友嗌交，我就走咗去旅行，因為不嬲都想試吓一個人去旅行，咁嗌咗交咪同佢講話自己去旅行，但最後都係唔成功，因為畀男友追番！」