五位《盛女愛作戰》的女主角Suki、Bonnie、Florence、Gobby和Mandy遭外界狂插及跟蹤，形象變得負面，心情大受打擊要收埋自己不敢返工，Suki與男友Zion昨日更避走外地散心，而Bonnie亦book定機票離港，會計師Florence則最慘，報道出街後她慘被公司高層「照肺」要她停薪留職，目前她不敢返家連街都不敢出，一班「盛女」經濟頓失，有人正打算向無綫「索償」！
無綫原定安排五女上本月22日及29日的特備節目《盛女駕到》分享播後感，但五女感到被擺上枱全部拒絕亮相，無綫惟有改邀專家評判「補位」講感受。節目監製衞世輝昨日說：「我都好同情佢哋，但節目到依家未知點做。」他否認擺眾女上枱：「係其他報道造成佢哋咁樣，我哋係好正經將過程播出嚟啫。」
另外，有指Mandy與《盛女》編導岑應相識找她來做「媒」，無綫了解過後，指雙方雖認識但當中並無利益關係，Mandy參加演出純粹想搵男友，貼合主題才參加。而人生教練Winnie昨日如常工作亦成為追訪對象，她在facebook上指有廿人同行應該很安全。