劉美君拍拖 10個電燈膽
育有三子女的潮媽劉美君跟混血兒男友打得火熱，難得男友來港跟她共聚，但她寧捨二人世界，帶同十個八個「電燈膽」一齊去遊玩，原為她早就把粉絲當成家人看待。
劉美君跟男友拍拖三年，雖然分隔異地，但無損兩人感情，她笑說：「搵唔番第二個。」兩人打得火熱，男友每兩個月都會來港跟她相聚。
視為一家人
日前兩人約好到迪士尼樂園遊玩，本來可以二人世界，但劉美君竟然帶埋粉絲一齊去拍拖，她笑說：「我覺得好好，有咩好得過帶佢哋去玩，我覺得呢種互動親切有意思啲，有益身心，好過就咁食嘢。」
喜歡與粉絲進行家庭式聚會的劉美君，每次抽選十個八個粉絲，她說：「因為人太多就難兼顧，冇咩溝通，所以每次最多十個人。」視粉絲如家人看待的劉美君，大讚粉絲好抵錫，她說：「我都唔係佢哋親人，佢哋都咁關心我錫我，我關心番佢哋係好自然，粉絲識我男朋友，連我啲仔女叫咩名都知，我會好似媽咪咁，會check佢哋功課，要知佢哋成績，大家係一家人。」
冇打算再婚
連男友也對她的粉絲愛屋及烏，劉美君跟男友拍拖三年，感情有增無減，她可有想過再婚？她笑說：「唔好囉，依家好啲，結唔結婚冇乜關係，大家一齊三年，真係好夾。（男友咁靚仔你放心？）我哋感情係慢慢咁建立，我對佢係好有信心。」稍後她會放三個月大假返美國探仔女及男友，她笑說：「做人係要平衡吓先得。」
文：音樂組