陳豪：北上掘金遲o的先
近年不少藝人紛紛北上拍劇吸金，身為無綫當紮小生的陳豪亦自爆有人斟過檔，曾奪得無綫雙料視帝的他，天性喜歡按部就班，因此會專注拍攝新劇，日後再圖北上掘金！
上回講到我視加入TVB係我做呢行嘅最後一步，重新追求做演員嘅基本功，我相信天生演戲好嘅人，可能一百個裏面只有一個，其他個個都係普通人，要令自己做得好，就得四個字：熟能生巧。呢幾年我不停拍劇，雖然捱更抵夜嘅日子好多，但係我都希望逐步去學，07年公司頒個視帝獎畀我，我覺得係一個對自己好好嘅交代。
新劇挑戰 學唱崑曲
眼見呢幾年好多戰友如佘詩曼、馬浚偉都北上發展，仲聽見啲「冧巴」好似愈黎愈離譜，去到千千聲，令我有啲質疑。雖然我都有人叫我拍，不過首先要睇夾唔夾到期，第二自己係一個好現實嘅人，我唔會想太多無謂嘢，如果眼前有一件好重要嘅嘢要做，我就只會專注地去做，將來有時間去諗先再算。最近都忙緊籌備拍《金枝慾孽（貳）》，呢個角色好挑戰性，戲入面要唱崑曲，呢個並唔係可以打天才波就得，因為崑曲好注重咬字、發音、口形，發音都細分齒音、鼻音，加上用國語發音，好深層次，所以暫時會專注呢套劇先。
良性競爭 觀眾受惠
至於王維基嘅新電視台誕生，好多前同事都過咗去，其實我睇見呢場電視圈風雲，係覺得開心，因為我見到電視業開始蓬勃，唔再係只得一間電視台好，而係大家都好，造就好多就業機會。宏觀啲嚟睇，TVB仲有好大優勢，佢配套非常十足，我哋要好好裝備自己的軟件、自己嘅人才，相信要贏對手唔係太難嘅事，更何況有競爭，大家都會落足力去演，受惠最終都係觀眾。
口述：陳豪 筆錄：專案組