陳嘉桓賣肉內衣騷 刺痛粉絲
陳嘉桓（Rose）入行至今，為保持形象從未接過內衣騷，但自從其母Ronnie離開經理人公司之後，Rose工作即起變化，竟連內衣騷亦要接，令一班粉絲大感心痛！不過，其師傅冼國林否認要Rose賣肉，揚言Rose屆時穿的內衣很密實，絕不暴露！
陳嘉桓入行三年多，形象清純健康，其經理人公司為她揀選工作亦非常小心，從不接一些有損形象的工作。不過昨日記者於網上發現一班Rose的fans上載了Rose將於本周五行內衣騷的宣傳單張，對於偶像「賣肉」，fans們大感不快，又指自從Rose母親離開經理人公司之後，冇人睇住的Rose連內衣騷都要接，令他們十分心痛！
驚粉絲失望
對於網友的斥責，冼國林師傅昨晚與Rose、杜宇航出席「香港武術聯會聯歡晚宴」時，否認幫Rose接內衣騷是想她轉型行性感，冼師傅說：「唔係，一路都唔會特登去接啲露肉工作，呢個騷好健康，我太太都有幫眼去睇，冇問題嘅，（Rose粉絲在網上鬧爆喎！）我驚佢哋失望就真，唔係三點式嚟。」Rose則表示相信公司決定，自己不是轉型行性感，雖然母親不在身邊，但有師傅師母睇住應該沒問題。
師徒冇不和
此外，昨日亦有指冼國林與杜宇航鬧不和，兩人均否認其事，而身為香港武術聯會副會長的冼國林，還大讚杜宇航如此年輕便出任該會的執行委員，成績不俗；杜宇航亦否認自己詐病推job，並指自己一向都很尊重冼師傅，一日為師終身為師！
文：影視組