陳偉霆遭G.E.M.逼婚
陳偉霆（William）和G.E.M.（鄧紫棋）曾是過氣緋聞情侶，08年，G.E.M.的前男友和William一起學唱歌，她在前度介紹下認識了William，兩人同一年加入樂壇，種下朋友的緣分。在William眼中，G.E.M.當年是個低B肥妹，兩人最愛傾無聊話題，時至今天，G.E.M.仍會問他：「拍親熱戲會唔會乘機抽人水？」難怪William不會對她過電了！今次William請她做「唱雙簧」嘉賓，兩位80後談不出深情對話，他還被G.E.M.的「真」言無忌激倒，惟有借用候選特首金句：「呢個係我主場。」拿回主權。
W：陳偉霆 G：G.E.M.
可愛少女唱爆咪
W：你畀我第一個印象好恐怖，嗰時你男友介紹你畀我哋班friend識，大家一齊唱K，你突然點啲外國歌唱，嗌爆支咪咁滯，唱歌超級勁，嗰時你話就嚟出碟，結果咁啱同我同一屆新人。
G（嘟嘴）：你成日恰我，搞到我好冇自尊，特登喺我隔籬企到好直。
W（抵死地）：我一向都企到好直，男人要有腰骨有膊頭；當時你真係畀我感覺好肥，咁啱之前我極瘦極冇營養，跟住搵咗個教練操fit變大隻，又介紹教練畀你減肥，你好叻女，依家瘦咗好多。第一年入行大家一齊拍戲，認識到你好多低B嘢。
G（撒嬌）：你可唔可以畀番少少面我。
「有冇鍾意過我」
W：哈哈！你係個我喺呢行頗為欣賞、覺得好勁嘅生力軍，大家都知道你天真又可愛，但你上到台畀人感覺好極端，喺台上好似老咗十歲咁，呢幾年睇咁多演唱會，我覺得你個騷係最勁最好睇。
G（勁開心）：多謝《東方》，平時冇機會聽到William咁正常講嘢，平時你係：「喂！靚妹、肥妹。」咁話我，唔知點解我哋畀人傳緋聞，係全世界全宇宙最搞笑緋聞，其實你有冇鍾意過我？
W（大反應）：梗係冇啦！年齡相距得太遠，你心智得幾歲，大家都唔信啦，所以我哋可以光明正大食飯，我都唔知點解會傳，可能電影公司要宣傳。
G：但我好唔滿意話我追你，點解唔可以話你追我呢？
W：咁你畀人感覺係主動啲啩。
G（抗議）：梗唔係，我個人好怕醜，所以我好唔滿意呢啲緋聞。
W：冇人信嘅，唔使咁介懷。
怕醜妹戀愛被動
G：有呀，有人覺得我好主動，我要澄清，喺戀愛世界我好被動。我哋做到朋友真係幾神奇，不過我哋太過九唔搭八，如果我又高又靚就話有人信啫，你嗰個（蔡卓妍）又高又靚。
W：你嗰個（林宥嘉）都唔差，唔一定要搵啲高過你好多嘅。
G（睩大眼）：咦——乜嘢呀！
W：咁你依家係咪單身呀？
G：唔好問啲咁嘅問題得唔得呀，（反擊）你依家好開心吖，幾時結婚生番幾個呀？
W：我唔諗住結婚，因為年輕囉。
G：我諗住22歲結婚喎，你做乜唔諗呀？
W：你小心啲講嘢，你諗住同邊個結呀？
G：點知啫，算啦，諗住二字頭結婚，29歲都得。
有冇乘機抽人水
G：睇《前度》覺得你好勁，點解可以咁神似？我覺得自己唔啱做演員，我唔係同嗰個人拍拖嘅話，做啲親密嘢會尷尬到暈，但你好神似喎。
W（得戚地）：因為我係演員囉。
G：你會唔會乘機抽人水呀？
W（大叫）：嘩，你咁問嘢架，應該做記者啦，梗係唔抽水，唔諗呢啲嘢。
G：你唔諗咁點代入呢？
望拍搞笑兄妹片
W（沒好氣）：你拍拖同男友kiss，會唔會覺得男友抽你水，冇人會咁諗，你諗嘢正面少少好唔好？呢度係我主場，依家我問你，唉，但正經嘢真係問唔出！
G（賣口乖）：講樣嘢你知，其實我11歲睇新秀，覺得你呢個哥哥好靚仔，我好記得，因為你跳舞好勁，後來上網搵你資料。
W：你唱歌跳舞都好好，跳舞嘅人唔一定要好瘦好高，你可以感染到人，我掉番轉要學你，因為我跳到唱唔到，你咁鬼勁，我要不停練歌。其實我好想同你合作拍部搞笑兄妹電影，同你一齊有神奇化學作用，覺得自己年輕咗，你同陌生人好cool唔出聲，但同我一齊就傻笑，真搞笑。
G：我成日忍唔到笑，唯一可以拍嘅係笑片。
W：各位導演，新一代笑星G.E.M.！希望有機會同你一齊拍笑片，哈哈。
冇薯片食喊餐飽
陳偉霆（William）笑G.E.M.低B原來有憑有據，話說當年兩人拍《愛出貓》時，有次William請大家食薯片，饞嘴的G.E.M.又話要食，點知William指她太肥唔好食，死都唔肯分塊薯片給她，結果G.E.M.哭了出來，嚇呆了William，他笑說：「我記得你真係喊要我氹番。」G.E.M.沒好氣說：「我幾時話要你氹番，你唔好加呢句嘢，你啲fans會打暈我，我只係叫你畀薯片我食咋，我嗰陣比較低能。」
採訪：音樂組 攝影：沈健程
陳偉霆
髮型：Davy@Chin G
化妝：Khaki Yan
服裝：Initial
G.E.M.
髮型：Adrian@Hair Culture
化妝：Jan Chan@Annie G. Chan
Make-up Centre