賈寶玉癡情執着 陳寶珠:同我相似

陳寶珠幼年曾在戲台上演過賈寶玉,2008年亦在籌款節目中演出《紅樓夢之幻覺離恨天》,名作家張愛玲說過:人生有三恨,紅樓夢未完是為其中之一。自言與賈寶玉一樣癡情執着的寶珠,對《紅樓夢》有份情意結。

我對每次演出期望都好大,希望盡善盡美,粵劇界人士好多都做過我師傅嘅四大名劇,我想揀啲少人做嘅,想觀眾覺得新鮮嘅劇目,今次嘅《紅樓夢》係新拍檔、新布景、新元素,將粵劇做咗多少嘅改良,希望畀到新嘅觀感觀眾。

兩分鐘換衫

今次為咗令個戲緊湊啲,個戲轉景只會熄燈,唔會落幕,演員要喺兩分鐘內換戲服,我都未試過。同咁多位專業演員排咗幾日戲,我感到戰戰兢兢,但佢哋畀到好多意見我,帶到我進入戲入面個感覺。

我最深印象係黛玉探病同寶玉發現被騙婚兩場戲,寶玉發現黛玉被換成薛寶釵嗰種悲憤,佢嗰種對感情嘅執着同癡情,我覺得同我都有啲相似。

不一樣感覺

我唔敢講觀眾睇完會認為呢齣劇係我粵劇生涯代表作,只望觀眾喜歡,我相信觀眾嘅觀感會同以往有所不同。 (完)

後記:燒肉見禮數

這次訪問小記媽媽的頭號偶像--陳寶珠,訪問的第一句話,卻是由寶珠先開腔:「食啲燒肉啦!」說畢已將兩塊燒肉各用牙籤拮好,請小記與攝影師分享。

這塊燒肉的滋味,這份視記者如朋友而非阿四的尊重,這份待人接物的禮數,尋遍時下整個娛樂圈,都屬罕有,小記終於明白家母為何仰慕寶珠長達四十載,而對時下的藝人,半個也看不上眼。

口述:陳寶珠 筆錄:影視組