Alina踩過界拍片教化妝

同公司的o靚模Alina及Ice近來各有新搞作，向來對化妝整頭有心得的Alina有意仿傚「美容女王」羽翹，將教化妝片段放上網跟人分享，她說：「不嬲我都鍾意自己整頭、化妝，雖然冇正式去上堂學過點扮靚，但係化咗咁多次點都學識啲技巧！」至於鍾情神怪故事的Ice就為電視節目《怪談．靈異直播》擔任主持，得了「怪談小師妹」這個稱號。

Alina有意仿傚羽翹，將教化妝片段放上網跟人分享。

Ice因主持靈異電視節目而有機會接觸眾多奇異事件。

訪清邁鬼上身

而Ice早前更走訪泰國、台灣及內地找尋奇人奇事，見識過內地有個大師懂得幫動物點穴，令牠們動彈不得！她去清邁探訪鬼屋時更被鬼上身：「我嗰時唔知自己做乜，只係見到一啲過去嘅片段湧埋嚟，跟住我又不停咁打啲攝影師，五個大男人都制止唔到我！最後佢哋個個都損晒，淨係得我冇穿冇爛！」她有意將所見所聞輯錄成書，望可找有興趣人士投資。

望各自出寫真

兩人今年會繼續拍住同公司其他o靚模出寫真，由於是第二次影寫真，她們不諱言表情、甫士及性感程度跟去年都會很不同，並期待下年可各自單拖出寫真！

採訪：專案組

攝影：劉智源

服裝、場地：Amelie Street

飾物：MoonFolks