洪卓立孱仔變雞王
歌手洪卓立（Ken）入行5年，其官仔骨骨的形象多年未改，早前因肺積水而一度入院，更被外界視為「孱仔」一名，Ken直認曾為此名而不悅，自誇體格絕不遜於同公司的任何歌手，更自封「雞王」，指鍾舒漫（Sherman）也是他的「口下敗將」。
Ken於08年因患肺積水及胸膜炎，要急送院做手術續命，當時手頭上所有工作被逼叫停，幸好休養了數個月後已完全康復，可惜「孱仔」一名卻印於每個人的腦海內，Ken表示：「我肺積水嗰單嘢，係好多年前嘅事嚟o架啦！之前我趕唔切喺大陸趕返嚟香港跑馬拉松，啲人又問我係咪身體有事喎！我真係想講，我唔係『孱仔』囉！」問他是否很討厭被稱為「孱仔」？Ken直認：「有o架，因為都唔係事實。」
瞓石碌地冇病痛
Ken揚言為抹掉惡名，他在新碟中以全新造型出現，且開始健身做「壯丁」，問他健康狀況？他自認捱得：「早前我喺大陸拍戲，喺好惡劣嘅環境下，我都捱得過，早前我喺一個山窿度影咗成日唱片封套，我又瞓石又碌地，我全部都做到，完全冇問題。」
廿幾分鐘吞隻雞
Ken自詡是「大胃王」，記得有次同飯局鐵腳Sherman食火鍋，兩人私下比賽食量，結果被公司同事喻為食量如牛的Sherman，也敗於他口下，只得他由頭食到落尾。問他最瘋狂勁食的一次，他說：「我次次都好勁，廿幾分鐘可以食一隻雞，我係『雞王』嘛，我咁食得，就證實我身體好，消化力強啦。」
場地：CLUB MONACO
服裝：La Mod Salon＆Hair Spa
髮型：Ziggie L＠La Mod
化妝：Sherman Fung＠Love Cosme Make Up
採訪：音樂組