林穎彤考演技精神分裂

無綫小花林穎彤（Bella）在新劇《東西宮略》中，飾演齊國大王郭晉安的妹妹田芸公主，與史官梁烈唯譜出爆笑戀情，她說：「因為我唔想嫁去燕國，一出場就詐癲扮傻，後來我同唯唯邂逅仲私奔添！」她自爆為《東》劇獻出不少第一次：「呢套係我第一套喜劇、古裝同重戲份嘅戲，所以對收視好有期望。」並指不少幕後人員大讚《東》劇好看，為她打下強心針。問到會否打算穿三點式慶功？她笑自己「冇料到」：「係都留番畀法拉啦，話晒好睇啲！」

演公主的林穎彤與梁烈唯玩私奔。

林穎彤（左）與朱晨麗在《名》劇中飾演失散姊妹。

謝天華取笑

雖然在《東》劇放笑彈，但Bella卻在另一劇集《名媛望族》中變「喊包」：「我喺《名》劇同朱晨麗飾演失散嘅姊妹，但我係啞嘅，仲畀人賣咗落妓寨做『琵琶仔』，後尾吳卓羲救番我出嚟，本來打算以身相許，可惜食檸檬。」面對超悲情角色，她坦言感到精神分裂：「《東》劇同《名》劇差唔多時間拍，但角色遭遇係天堂與地獄，前者溫馨搞笑，後者喊到眼都腫。」並笑言與朱晨麗為了效果好經常谷淚，最後雙雙喊到變「大細眼」，她說：「Laughing哥（謝天華）仲笑我個角色咁慘，唔死都冇用！」

完美主義者

除了忙拍劇外，Bella亦希望在主持界站穩陣腳，更希望如曾志偉般轉數快，她說：「主持好難做，要講急才同內涵，志偉哥真係典範。」年紀小小的她自言危機感十足：「螢幕上嘅形象可能好搞笑，其實私底下係完美主義者，成日『匿』埋一邊咪劇本，好多嘢諗架！」

場地：金玉滿糖

髮型：JJ@Xenter

化妝：Rita Leung@Imagine Art

文、攝：阿彭