關楚耀日本拘留冇啖好食

關楚耀（Kelvin）近日為now觀星台《關人煮事》任主持，首集將於3月12日黃金時段播出，處男下海的他緊張得徹夜難眠。Kelvin邀得契哥張敬軒任首集嘉賓，要軒仔品嘗他煮的紅酒燴牛尾，軒仔笑說：「今日冇咩帶嚟，只係帶咗止屙藥。」食過契細佬手勢的軒仔讚口不絕：「頂呱呱，估唔到你咁好手勢，真係加分！」

眼紅紅 擁抱安慰

之後軒仔抵死地問Kelvin：「有樣嘢真係好想問你！」Kelvin示意隨便發問，由於Kelvin早年曾在日本涉嫌藏毒被押拘置所，軒仔笑說：「其實你當年喺日本（拘置所）食咩o架？」Kelvin大方說：「當時好凍，又冇乜胃口，唔係大家所諗有壽司食，總之啲嘢係凍嘅，好多時會飲綠茶暖肚。」

關楚耀眼紅想喊，軒仔即上前擁抱予以支持。

兩人在節目歎紅酒嘗美食，無所不談。

Kelvin感激軒仔當年為他寫求情信，說時更眼紅紅，軒仔即上前擁抱對方，場面感人，Kelvin說：「真係好多謝你。」軒仔透露當年有不少藝人、歌手都致電及傳短訊給他：「好多人包括有大星都同我講，如果要佢哋簽名就出聲，其實好多人好錫你。」Kelvin承諾日後會努力工作報答大家。

文：音樂組