陳敏之讚法拉：可以做編劇

陳法拉、陳敏之及郭晉安等昨日宣傳新劇《東西宮略》，當「東宮」法拉與「西宮」敏之在扯大纜爭「大王」安仔時，「正印東宮」歐倩怡攜囝囝郭令山踩場，加上山山不斷叫爸爸「安仔」，搶盡兩位娘娘鏡！

逐條黐做假眉

以鍾無艷造型現身的法拉大呻化妝時間耐：「畫條眉都成粒鐘，逐條毛黐上去架！」對於被指「扮阿姐」教敏之做戲導致不和，法拉否認：「生日嗰陣先同敏之、伍姑娘一齊慶祝。（男友送咩？）佢都有一齊去，仲訂咗個蛋糕。（禮物？）秘密。」而敏之亦澄清與法拉姊妹情深：「我哋私下會一齊行街，法拉之前先煮西餐畀我食。（教你做戲？）冇，我哋一齊度橋啫！法拉好有喜劇天分，可以做編劇。」

歐倩怡（右）攜囝囝到場，郭晉安顧住抱仔懶理「東西宮」是非。	法拉被兩位猛男抬起，嚇到口擘擘。	眾演員扯大纜玩遊戲。

擺唐英年上枱

至於安仔透露兒子在家中亦稱他為「安仔」：「佢跟媽咪叫，我哋好似朋友咁相處，佢想翻轉個屋企都得，所以好黐我。（再追？）唔喇！夠晒數。」他表示為了兒子知悉自己是演員，故特意帶他出席活動。

此外，阮兆祥及梁烈唯玩寸唐英年及曾蔭權，梁烈唯說：「大王有東宮、西宮，算唔算有感情缺失？」祥仔即笑說：「但大王有膊頭有腰骨。」二人又笑指大王起地牢藏紅酒兼以私人馬車載大家周遊列國，連安仔亦玩埋一份：「大家會有紅酒做禮物！哈哈！」

文：影視組