楊千嬅：有產前抑鬱

依家個肚6個月大，得知有BB那一刻好開心，但當時未消化到件事，個人呆呆地，丁生仲以為我「吹水」：「係咪咁易？」我都冇諗過咁易有，因為之前好多煞科宴，個個星期都有人請食飯，日日飲香檳，飲到癲喪個隻，原來真是整定的，即第一時間通知媽咪、奶奶，她們叫我不要對人講，因為驚小器，仲講了大堆中國傳統婦女要聽的說話，我當然記唔晒！

佗B開騷長輩鬧爆

有BB的事愈少人知愈好，但一個月後就要開騷，老公要我取消，但我話不可以，惟有想辦法改Rundown（節目編排），他梗係咆哮，我就話得啦，唱歌好小事，醫生都話唱歌冇問題，我會坐低唱，但到做騷時先知好大壓力，我完全高估了自己的能力，做騷時我都好驚，但一站在舞台上就得意忘形，老公就晚晚鬧，奶奶、阿媽、老竇都有吟我，尤其做完騷第二日我仲幫彭浩翔客串一部戲，點知未拍晒就不適即刻入醫院，醫生說：「楊小姐，你真係唔可以操勞，你要瞓床。」當晚在醫院真的好驚，情緒好低落不開心，好驚整親肚裏的細路仔，原來頭三個月的危險期可以好壞，所以我乖乖在家中休息了成個月養胎。

佗住囝囝這幾個月我會自我反省，不停在想將來，好多人生觀都不同了，最近開始feel到他在郁動，個肚畀我想像中大，感覺好得意，但成日都會好擔心，每日瞓醒都會諗：「唔知佢有冇事呢？尋晚打側瞓係咪會磧親佢，有好多奇怪諗法。」產前產後抑鬱每個人都一定會有，冇得擔心，只是快定慢、長定短，以及身邊人的支持夠唔夠，如果touch wood發生乜事都係整定、天意係冇辦法，咁樣諗我個人就輕鬆少少。

轉口味 最愛偷食

好多人都會話大肚婆大晒，但我無大晒、無蝦老公，點吓老公攞呢樣攞嗰樣係有的，其實我不是太緊張，但畀屋企人搞到我好緊張，工人會將我的行蹤話畀老公知，跟住佢個電話就到問我去邊，奶奶、阿媽輪流打電話來，有時都會忟忟地，但我知係幸福的！

懷孕後口味都有轉變，恨食咖喱恨到不得了，但中醫就不建議我食一些有香料的食物，所以唔食得感覺好慘，以前鍾意食海鮮又食唔到，因為覺得好腥，依家都愛食公仔麵，奶奶見唔對路，就走去買米粉畀我食，覺得食米粉比公仔麵好，但我都會偷食，唔知點解有BB後好鍾意偷嘢食，可能因為做artist成日要減肥，樣樣都唔可以食，依家唔食飯簡直係罪，所以就亂來。

犧牲工作 好值得

有BB後生活變得有規律，跟我先生的溝通、說話都多了，因為不再單屬於我們兩個人的事，老公的轉變比我更明顯，當知道有機會做爸爸時，你會感受到他更努力去做，我知他工作好辛苦，我想像不到囝囝個樣，似我可能好少少，但性格似老公好啲，性格獨立，工作上都有領導才能，運動方面幾好，個人又細心，如果似我就領嘢。

放低工作，我不覺得為BB犧牲好多，反而覺得以前我犧牲晒全部時間在我工作上面，依家難得有自己家庭，個天給了我機會去做，反而要珍惜這個機會，我覺得我沒有犧牲過，這段日子我都會諗點解結婚的事不能夠早些發生，但如果早發生我未必應付到，因為我未開竅，有些事未想得通，我可能不會珍惜，個結果一樣不好，最後都可能要離婚，因為timing好重要，如果早兩年有BB我都不知怎辦？但依家我就準備好了！

口述：楊千嬅　筆錄：音樂組