甄子丹自毀形象 囝囝喊bad man
一向形象健康的甄子丹，為新片轉look，此舉破壞了在囝囝心目中的好人形象，嚇到囝囝大叫「bad man」，而詩詩則大讚囝囝未學功夫已郁手郁腳，甚有天分繼承子丹衣鉢。
甄子丹與太太汪詩詩、李玟與老公Bruce、雷兆光夫婦、Amanda S.、廖碧兒、周汶錡、王敏德與太太馬詩慧等等，昨晚齊齊出席「癌症基金慈善餐舞會」。甄子丹以新look現身，不僅皮膚晒黑了還留了鬍鬚，但略帶疲態，被問到是否三日冇瞓，他說：「都唔係，只係瞓得少，每日兩個鐘，最近喺深圳拍緊時裝警匪片，要留鬚仲要紋身，個仔見到我都嚇親，指住話係『bad man』。」子丹表示今次形象與之前不同，女兒比較明白，但就嚇親囝囝，他說：「我喺佢心目中有特定形象。」
有耍功夫天分
而詩詩表示兩公婆各有各忙，難得見到老公，就算情人節也是她抽空到深圳探子丹，她說：「佢套戲好多動作，真係好辛苦，我仲拍咗段片畀囝囝睇，等佢知道爹哋辛苦，佢以前都有睇《葉問》，囝囝都好proud of呢個爹哋。」又大讚囝囝雖然未正式學功夫，已好有天分，她說：「佢成日郁手郁腳，乜功夫都識得耍，好有天分，畀把遮佢都識耍功夫。」子丹被問到會否想兒子繼承衣鉢？他說：「睇吓點，依家報咗名畀佢學功夫。」
李玟捧Lady GaGa
而李玟與老公到場，被問到有否撲Lady GaGa嘅飛，她開心表示已有四張在手：「我諗住同屋企人去睇，如果唔得閒就會送畀人，我知啲飛好爆。」另外對於雲妮侯斯頓逝世，她說：「我好受佢影響，我好鍾意佢把聲，我參加新秀時都係唱佢嘅歌，平時都經常聽佢啲歌。」
文：名人組