最大的大話 Mandy Lieu睇騷扮夠秤
相信每個人都試過說謊，美麗的謊言當然不怕講，但一班明星在年少無知時，竟說過可惡的大話！歌手周柏豪就試過偷用鄰居的電話致電收費熱線，結果令鄰居「硬食」千多元電話費，仍死口不認是自己所為；而名模Mandy Lieu為了欣賞心愛樂隊在酒吧的演出，未夠秤的她訛稱自己18歲，事後想起這件事仍心慌慌！
Amanda S. 好心的謊言
「冇講過衰嘅大話，只係試過幫朋友而講，我有個朋友同男友分咗手，之後出街見到嗰個男仔，我都唔會同朋友講番見過佢前男友，費事佢唔開心。」
官恩娜 走堂遊赤柱
「細細個試過走堂去玩，我有次唔去上鋼琴堂，因為我雖然鍾意彈鋼琴，但覺得啲樂理好煩，跟住我就去咗赤柱玩，以為可以瞞天過海，點知最後都係畀媽咪知道。」
周柏豪 打完唔認數
「七歲嗰年去隔籬屋借鋼琴練，咁啱見到黃家駒喺電視賣廣告教打機技巧，但個電話要每１秒收費６毫，我就用鄰居電話打咗去，後來鄰居收到電話費要成千蚊，走嚟問我阿媽，我冇認到，仲話係人哋啲仔女打，我依家先認，可以問我要番錢。」
Jocelyn & Anthony驚喜大話
「我試過有一年呃媽咪話返唔到屋企過聖誕，搞到媽咪傷心到喊，點知我突然扮成聖誕老人出現喺屋企，畀咗個好大嘅驚喜佢！Anthony都係咁同佢爸爸講，結果令爸爸覺得好驚喜，我哋講大話都係為咗氹父母。」
李樂詩呃阿媽歐遊
「有次同媽媽講要去上海做嘢，其實係同朋友去咗意大利玩，點知有一日朝早四點幾，媽咪打嚟問我做緊乜同喺邊度？當時我瞓緊覺，認唔到係媽媽把聲，結果自爆喺意大利！」
張國強乜都話幾好
「講得最多嘅大話係人哋問我『幾好嗎？』我無論環境好唔好都會答『幾好呀！』其實係講緊大話，明明唔開心又要扮到開心，不停講幾好幾好。」