陳嘉輝信小冰 唔使私有化
前港姐梁小冰與老公陳嘉輝早前備受婚變傳聞影響，不過似乎已雨過天青，昨日兩人十指緊扣出席代言活動，還不時眉目傳情晒恩愛，嘉輝揚言兩人感情不變，小冰亦預告將全力復出，嘉輝即大讚老婆演戲有天分，不會把她私有化。
梁小冰與陳嘉輝向來是圈中模範夫妻，不過早前小冰卻被拍得與過氣VJ王志海當眾有親暱舉動，隨即引來婚變傳聞，而昨日陳氏夫婦自事件後首度雙雙亮相，在旺角街頭宣傳代言產品活動，吸引大批市民圍觀，再加上一班龍友，令現場擠得水洩不通。
身穿粉紅色泰山裝的小冰率先現身，並一臉甜絲絲表示是日由老公當柴可夫接載到現場，她說：「今日落雨，老公喺最近呢度嘅地方放低我，等我行少啲路，佢先去泊車。」未幾嘉輝便從人群中出現，與小冰十指緊扣，又搭晒膊頭讚太太靚女兼愈見愈後生，逗得小冰笑不攏嘴。
寸爆復出接戲
對於太太的緋聞，嘉輝直言投她信任一票：「佢講嘢代表晒我講，我哋感情好好，一直冇變過，最緊要係互相信任，同畀空間對方，我唔想太太似金絲雀咁困喺屋企，否則我同二世祖冇分別，佢身邊朋友我都識，都識嗰個男仔，亦信我太太。」小冰也斷言表示夫婦感情不變，更帶寸謂：「依家我發現要拍親熱戲，或同男同學出街，要備案唔係屋企人，係先同傳媒講，最近我轉咗跳舞學校，講定全部係女仔，費事傳我斷背。」
事業心重的她還發表復出宣言，指稍後將有舞台劇及電視劇演出，在旁的嘉輝亦大讚小冰乃其心目中有天分演員，故不想把她私有化，令小冰感動得眼濕濕。
文：影視組