金剛嗒謙仔「舊愛」糖

金剛艷福無邊，除與DJ阮小儀傳緋聞外，近日又被指力追「神獸天使」蔡慧欣。二人前晚與羅仲謙、周秀娜、江若琳等錄影《五覺大戰》。由於謙仔早年先後與周秀娜及蔡慧欣傳緋聞，碰巧金剛的過氣緋聞情人張嘉兒亦路過，五角關係混戰非常！

力撐性感無罪

金剛與蔡慧欣被要求合照時表現忸怩，金剛否認力追女方，但又不排除有發展機會。他說：「佢係好可愛，我又單身，識朋友冇問題。」並力撐蔡慧欣於節目性感無罪：「幾好吖，28點收視喎！」金剛更不介意蔡慧欣曾與謙仔傳緋聞：「楊怡知唔知？大家係朋友，我唔覺尷尬。」

森美笑指金剛喜歡身材勁的女士。	張嘉兒未有與緋聞男友金剛合照。	江若琳沒有捲入「五角大戰」，玩遊戲時心情輕鬆。

金剛又稱感情事要順其自然：「我同前女友就係發展太快，唔磨合。」他強調自己不爛滾，兼沒有喪鬧前女友：「我係鬧前女友個朋友，我分手都有風度。而且當日我答『我唔係條條女都啱』，報道就冇咗『唔係』兩個字。」蔡慧欣則未有正面回答是否被追求，更強調沒有向金剛派檸檬：「做住朋友先。」

周秀娜要檢討

慘遭拖落水的謙仔及娜姐齊齊祝金剛心想事成，娜姐搞笑謂：「我頭先問佢（金剛）係咪我唔啱你，合作過都冇傳緋聞，我要檢討吓！」

另外，DJ森美昨日出席活動，提到拍檔小儀與金剛傳緋聞，他笑稱一定不實：「金剛好鹹濕，最鍾意身材好、身材大！我寫包單一定唔會鍾意小儀，唔係我擺十圍！」

文：影視組