熊黛林冇得正名殘到落形
年屆31歲的熊黛林（Lynn）近來恨嫁恨到發燒，有見和城城感情穩定，早前單方面出招想令關係再進一步，詎料弄巧反拙，事後和城城吵大鑊，令到雙方關係陷入冷戰狀態，深感「玩大咗」的Lynn，連日短訊發功亦告失效，完全唔知點收科，昨日一副殘樣陪父母買餸，為免再多口有反效果，全程封口。
熊黛林和郭富城自06年底拍MV撻着後，低調發展五年多的地下情一直相安無事，多年來Lynn恰如其分做其「地下天王嫂」，直至最近，外間不時傳出兩人結婚消息，令到年屆31歲的她逐漸心急「恨嫁」，多次公開談及結婚話題，甚至說：「我結婚唔會唔講，因為希望有大家嘅祝福！」愈來愈大膽的Lynn不時隔空施壓，期望盡快得到浮面的身份。
隔空詐嬌失敗
日前Lynn自爆情人節收到吊墜，再一次高調晒甜蜜的她令到城城相當不滿，城城同日出席公開活動即作出否認：「咁好？不過真係唔係我送架！」據知兩人當晚即因而吵大鑊，城城翌日更憤而離港往馬來西亞籌備新片。Lynn有感被公開落面相當委屈，翌日馬上詐嬌還擊，出席活動時更改稱對方為朋友，一副「佢還佢，我還我」姿態，更說以後不想再提及城城。
報道一出後全城認定兩人情海翻波，但城城卻一點表示都沒有，Lynn有見隔空詐嬌失敗，明知城城忙於工作亦施出短訊攻略，狂傳短訊箍煲求饒，繼而在微博出招，借錶示意「可以回到從前嗎？」，不過城城今次依然企硬，完全「零反應」，昨晚更開心地更新微博，風騷地說：「等我回來yoyo！」完全懶理Lynn，預告星期四回港出席活動。
深知自己「玩大咗」的Lynn陷入愁爆情緒，連日以淚洗面，鬱鬱寡歡並且愁到病，直至昨日下午2點半左右，Lynn在雙親陪同下踏出家門，素顏殘爆的她戴帽又戴口罩，親自揸車到北角春秧街陪父母買餸，情變的Lynn全程零表情，目光渙散，跟着父母在人群中穿梭，一度拖實爸爸，靠親情作慰藉。
拒陪兩老飯聚
記者上前問Lynn：「係咪同城城分咗手？發生咩事？依家同城城咩關係？有冇搵城城？」Lynn一概聞而不答，逕自向座駕走去，而熊爸爸和熊媽媽亦緊張地緊隨其後，一家三口齊齊上車回家。
據知，今次父母來香港探親小住，Lynn一直希望城城可以陪兩老食飯相聚，怎知，忙於在泰國拍戲的城城多翻推搪，指工作忙沒有時間，造成兩人摩擦，感情出現前所未有的危機。
文、攝：追蹤組