蔡少芬抱重磅B女 谷氣返歸

蔡少芬（Ada）去年為迎接B女楚兒出世，豪花700萬於元朗買下千呎獨立屋，更大事裝修，作為一家三口的安樂窩。及至早前Ada外婆去世，同時被揭母親爛賭個性不改，Ada和老公張晉不久後被目睹外出睇樓，於是傳出她有意大屋換細屋，套現為母還債。

張晉逗女顯父愛

不過，本報發現Ada一家三口至今仍在元朗愛巢安居，間接粉碎賣樓傳聞。最近Ada和張晉齊齊放假，樂於在家陪伴愛女。日前下午一時多，張晉駕駛七人車由寓所出發，直駛往屋苑內的酒樓，未幾Ada和兩名親友步出，愛女楚兒由一名女友人抱實，張晉邊行邊逗女兒，可愛的楚兒望住爸爸不停笑。

放大圖片	張晉望實B女已經冧到痹。

一行人飽肚後登上座駕齊齊回家，愛女心切的Ada抱實楚兒落車，出世時已重達9.4磅的B女，如今9個月大，繼續肥嘟嘟，手手腳腳有如小節瓜般，十分可愛！向來運動量十足的Ada，抱女時都要抿嘴谷到盡，急急腳回家。

低調外婆身後事

對於賣樓套現傳聞，記者致電Ada經理人若蘭，她說：「睇樓唔一定等於要搬屋啫，用嚟投資都得，總之我冇聽過佢想搬屋啦！」另外，據知為免外婆的身後事受到打擾，Ada家人已極低調地為老人家辦理妥當。

文、攝：追蹤組