Balia趷籮步步為型
徐淑敏（Suki）與陳祉妤（前名：陳沛嘉，英文名：Balia）在徐淑敏老公黃浩介紹下認識，兩人大談扮靚之餘，Balia更暢談入行多年的模特兒血淚史，當中一段段難忘經歷，令Balia對自己要求一絲不苟，絕不能容許0.1的失敗，亦因為極高的工作要求，琢磨出Balia在模界的名模地位！
陳：陳祉妤
S：徐淑敏（Suki）
新人等足三粒鐘
S：Balia我認識你嘅時候，你已經係好出名嘅名模，你由初入行到成為名模，心境上有冇好大轉變？
陳：你識我嗰陣我已經係「老模」嘛！哈哈……其實我覺得名模只係一個名，只係資歷耐啲，懂得演繹唔同品牌，並非高高在上，所以心境上冇乜大分別。
S：初入行競爭係咪好大，會唔會好辛苦？
陳：初入行時，新嚟新豬肉，曾經試過要夜晚六點半開騷，但因為當時知名嘅模特兒都會有髮型師、化妝師優先幫手，我啱啱入行，大家都唔識我，所以我就坐埋一邊，點知一等等咗足足三個鐘頭，到六點鐘，我打畀模特兒公司老闆，同佢講我仲未化妝、整頭，當時差啲急到喊出嚟，嗰時我連眉都唔識畫，真係好驚，好彩最後都趕得切，亦因為呢個經歷令我對新人會比較照顧。
運動keep住靚
S：做模特兒一定有好多扮靚、keep fit心得，可唔可以分享吓？
陳：我覺得第一樣嘢係開心，呢樣真係好重要，因為可以由內靚到外，另方面要飲食均衡，我嘅意思係乜嘢都要食，甜品、澱粉質都會食，但我就會少食多餐，同埋keep住做運動。我嘅髮型師問我點解咁瘦，我答咗好多年都答到攰，其實大家都知點解但又唔會做，我每星期跑步三次，每次半小時至四十五分鐘，運動對keep fit好有效。
一唔掂即刻被叮
S：有冇扮靚、瘦身嘅失敗經歷？
陳：冇失敗過，模特兒唔能夠容許0.1嘅失敗，所以我覺得做model辛苦過做藝人，因為model啲衫只得一個size，全球嘅衫都一樣，只要你fit唔到件衫，就要out，所以真係要keep得好好。我入行頭一、兩年，試過喺置地廣場一間大型品牌舖頭內試衫，當時十幾個女仔除晒鞋喺舖內一字排開，好似喺警察學校咁，其中有個女仔隻腳瘀咗少少，即刻畀個品牌高層當住成班女仔面前指住嚟鬧，仲好刻薄咁問個女仔知唔知做緊啲乜？即out，亦因為嗰次，令我對自己嘅要求都非常之高，喺屋企前後鏡咁照，睇吓有冇瘀傷、patpat有冇墮，做騷之前更加會望多幾眼，以免有任何缺失。
超模已絕種
S：模特兒應該具備乜嘢條件？
陳：年代唔同，依家藝人都會做吓模特兒，sell性格，但我哋以前嘅模特兒要求，係要行到大台，最基本都要身高有五呎九吋，胸不能太平亦不能太勁，約32吋左右，腰唔可以多過24、25吋，patpat最好33吋左右。
S：香港模特兒界，你最睇好邊個後輩？
陳：其實依家香港大多數都係一啲平面模特兒，行到大台嘅新一代香港model，可以話絕咗種！依家最top嘅都係我出道時已經好出名嘅馬詩慧、琦琦咁，不過佢哋都已經好少行騷。
誤信損友速斬纜
S：模特兒界同娛樂圈都有唔少富豪邀約飯局嘅傳聞，當年我都曾經「豬仔」過，試過有個幕後朋友叫我去一啲派對度坐吓，嗰時單身，諗住去同朋友見吓、傾吓偈，點知去到見到唔多對路，坐咗一陣就走咗，當然亦冇收過錢，但之後我聽聞個幕後朋友幫我收咗。我入行時好單純，真係冇諗咁多，後尾仲要係我老公講番成件事畀我聽，估唔到去一去坐吓就變成咁，真無辜，亦同呢個幕後朋友絕咗交。
陳：以前都曾經有中介公司問我去唔去飯局，我同佢哋講梗係唔去，仲講笑話我屋企有飯食。
S：我都有收過呢啲電話，嚇到我傻咗！
陳：我都有遇過你剛剛講嗰類派對，但我一入門口見唔對路就走人，真係會嚇親o架。
忠心的狗狗
S：我同你有唔少共同嗜好，大家都咁鍾意動物同美食，如果用一樣甜品或者動物形容我，你會點形容呢？
陳：我覺得你好似甜品心太軟，望住你個樣已經好窩心，再加埋眼神同笑容就簡直甜到漏。
S：我就覺得你嘅性格好似狗狗，因為狗狗會對所有人都好熱情，對自己屋企人更加忠心，永遠都會好支持身邊嘅人，同你做朋友絕對係非常開心嘅事，好似今日咁，你同我分享好多做model嘅經歷，好多都好特別，令我眼界大開，好多謝你。
文：影視組
攝影：黃叔榮
場地：礼Rei@ifc商場
徐淑敏
化妝：Vinci Tsang
髮型：Green＠Chin. G