吳日言被炒:畀仔飛咁Hurt

張智霖及HotCha所屬的唱片公司「星娛樂」近日人事變動,2010年底加盟由歌手轉型做節目主持的吳日言(Yan)因未能為公司賺錢,慘遭Neway提前解約,被「炒魷」的Yan直指公司不近人情及欠缺合約精神,她說:「好似畀仔飛咁Hurt。」

由諸葛紫岐未婚夫、Neway二少薛嘉麟揸Fit的「星娛樂」早前邀得「金牌經理人」黃柏高擔任顧問,隨即以開源節流為由與合約屆滿的董事總經理Kelvin Wong「講再見」,更開到聲「賺唔到錢嘅歌手就唔要」,其下屬即時「做嘢」為旗下歌手計數,最終吳日言(Yan)成為首個「開刀」對象。

被迫改無底薪

Yan承認日前收到經理人通知要求減薪,她說:「我係2010年10月簽約,合約列明每月都有底薪,上星期經理人問我可唔可以冇底薪,變相炒我魷魚,本身合約係2013年10月先完,同埋炒我魷魚都補一個月畀我吖,佢只係出埋2月份糧。」Yan感慨說:「咁大間公司都冇合約精神,真係冇人情味,好似畀仔飛咁Hurt。」

鄧芷茵疑被解約

Yan坦言有與圈外男朋友傾訴,並獲對方鼓勵,問到是否即時娶她?Yan說:「因為佢份工原本返夜,依家會搵份朝早工,聽完好感動。」Yan強調加盟公司後未獲支持,她說:「公司都冇擺資源落我度。」而同公司的新人鄧芷茵因死約屆滿而變回自由身,據知她亦被提前解約,但她堅稱是合約屆滿。

「星娛樂」經理人區小姐說:「同Yan一齊傾希望達成協議,轉個形式合作,之後佢就話不如和平解約。(話你哋冇合約精神?)依據合約細則條款同佢解釋,當中有咩問題,我哋可以再同佢傾。」

文:音樂組