周秀娜：無悔闖娛圈

細個夢想做空姐、導遊，因為我係一個坐唔定嘅人，想周圍去見識多啲，所以細個一諗就係諗空姐，因為可以四圍飛。到中學我誤打誤撞做兼職模特兒就入咗行，到依家開始拍電影。其實現實同我嘅夢想差距都唔係好遠，依家我都成日周圍飛，去好多地方見識，而且拍戲試好多唔同嘅嘢，學到好多嘢，同我細個周圍去嘅諗法幾似。

雖然細個覺得做明星唔難，但入咗行後同我當初諗法唔同，娛樂圈冇想像中咁簡單，成日聽到外界講黑暗一面，如飯局、應酬等，但我慶幸冇遇過，而且冇諗過背後咁多辛酸，要係接觸到呢行先會明白，好似我未入行之前睇八卦新聞，會諗點解啲藝人會唔想面對鏡頭，入咗行之後就明白大家都想有私人時間屬於自己，唔想畀人騷擾，我都係一樣。

同葉玉卿無得比

入呢行係好辛苦，而且現實係殘酷，但睇下係用咩心態去面對，我唔會後悔，選擇得呢條路你就要付出，老土啲講句「食得鹹魚抵得渴」，曾經有一刻好想去讀書，因為以前讀書唔識珍惜，中學走去做part time，只係讀到中五，所以如果有時間，我想去第二度讀書。不過依家先係我事業衝刺期，而且好鍾意拍戲，所以依家我一定唔會放棄事業！讀書都係遲啲嘅事，而進修就係我大個後嘅夢想。

唔少人都將我同過往一啲性感女星好似葉玉卿比較，但冇得比，每個人嘅路都唔同，佢哋成功嘅背後其實都有好多辛酸，只係大家未必睇到，而且我覺得成名路係冇得copy，我只係盡量去做，當然我會學習一班前輩喺呢行嘅堅持精神。