冼國林栽培愛徒 只求尊師不望回報
Rose經一事長一智，成功「智破」富豪飯局，最開心當然是扶持她成長的師傅冼國林，師傅亦覺得Rose成熟不少：「佢好明顯處事叻咗，識得避忌同防範，唔似以前全無防衞心，我成日同佢講，害人之心不可有，但防人之心不可無，呢啲係好基本嘅事。」
有些經理人公司跟藝人共度時艱的同時，會要求藝人加簽長約，冼國林覺得冇此必要，他說：「我係Rose經理人亦係佢師傅，師徒關係唔可以用年期限制，一個人識得尊師重道，根本唔需要用合約縛住，出現咗感情裂痕嘅話，留到人留唔到個心，都冇意思！我始終都唔係靠拍戲搵食。」
有實力打女
談到Rose的未來工作，他笑言：「近期Rose咁『黑仔』，應盡快安排佢到西樵山黃大仙祠拜神，去除黑氣。」新的一年，冼師傅希望Rose可以歌影視三線發展，年中先拍一部由他開拍的時裝電影，年尾則會拍攝內地電視劇：「功夫方面，我會安排佢加深訓練，要她做到名副其實的打女！」他亦期望Rose凡事勿驕傲，性格繼續純良，勿唯利是圖、冇人情味，要懂得知恩報德，他毋須Rose回報，只要徒弟有德行就高興！