G.E.M.行性感似棟篤笑
女為悅己者容，穿加細碼衫的G.E.M.，依然要為減肥而煩惱，事關包包臉及粗腿是她的致命傷，甚至曾想過埋羊腸線減肥，為了一個瘦字出盡法寶。
雖然身高只有5呎3吋，但最肥時卻有107磅，而且上鏡會肥10磅，搞到我唔減唔得，平日除了做運動、游水、跑步、打拳之外，仲試過由尖沙咀行去荃灣，足足行了2小時45分鐘，比地圖所寫的時間還快了10分鐘，簡直是一項壯舉。
埋羊腸線減肥
以前常被人取笑肥胖，其實我只係穿加細碼衫，身體和雙手都好瘦，不過塊臉和雙腿卻是重災區，甚至連監製都笑我塊臉似氣球，我發現做運動後，臉龐真的好快消腫，現在終找回下巴了，笑時酒窩還加深了呢。
坦白說，之前曾想過埋羊腸線減肥，不過，我祈禱問神可唔可以埋羊腸線？點知一祈完禱，開YouTube見到條短片，講有人埋羊腸線留20幾個窿，真係講都冇咁蹺，我就知道神叫我唔好做，所以我就做運動減肥，加上飲食控制，好快就見效。
圈中人我覺得陳法拉、梁詠琪都好靚女，靚仔就首推吳彥祖，雖然我唔覺得做藝人主要靠外表，但又唔可以太樣衰。
自覺係靚女
其實減肥唔只係職業需要，最重要係自己貪靚，雖然我覺得自己都幾靚女，哈哈，但可以更靚些。我覺得自己身材算平均，嬌小可愛，雖然減肥連咪咪都會細了，但反而更好，以自己的高度，肥就會顯得好大，舉個例子，就算你有36E波霸身材，但只有5呎3吋高，成件事就錯了。
所以，我覺得性感唔啱自己，跟我的樣子、性格唔襯，試過穿低胸衫去電影頒獎禮，那次經驗太恐怖，以後都變得好小心。性感一定要似女神好高貴，如果我呢啲咁矮的女仔，行性感只會似棟篤笑。
口述：G.E.M.
筆錄：音樂組