霆鋒做大廚 孖拉姑橫掃超市

去年鬧離婚的謝霆鋒和張栢芝，為了一對兒子Lucas和Quintus，近來愈行愈近，一家四口不時有家庭聚會，關係大為改善，霆鋒昨日更化身為住家男人，一改過往不羈形象，於中環會合拉姑買餸。

母子有傾有講

昨日下午3時多，霆鋒抵達超級市場陪媽咪拉姑買菜又買肉，期間兩母子有傾有講，霆鋒主動幫手推購物車，未幾已買滿兩大籃，當有客人認出霆鋒上前要求合照，心情大好的他來者不拒。

拉姑推車霆鋒攞籃，母子默契十足。

霆鋒忽然送抱，氹得拉姑呵呵笑。

及至發現記者後，拉姑雀躍地透露霆鋒最近愛上烹飪。問到霆鋒今年有否和栢芝食團年飯和開年飯？他坦承有一齊食，他說：「有，一齊食，（關係幾好喎？）飯成日都要食啦。（同栢芝點呀？係咪搞緊離婚？）仲搞緊。（有冇機會復合？）唔好講呢啲嘢啦！（係咪完全否定呢個機會？）冇否定，我之前都講過，點都係為兩個小朋友。」繼而回拉姑家煮飯仔。

霆鋒最近愛上烹飪，煮「大鑊飯」冇難度。	霆鋒昨晚三代同堂開餐，獨欠栢芝。（資料圖片）	霆鋒與拉姑掃完貨乘七人車離開。

四哥讚好手勢

記者致電四哥謝賢，他大讚霆鋒手勢了得，並說：「佢得閒就煮，仲會煮畀一班兄弟食，成十幾人，多到不得了，佢都幾好，又唔怕煩。（孫仔有冇幫手？）佢哋嚟玩啫，不過冇搗亂。（拉姑覺得點？）梗係開心啦！（栢芝有冇食？）飯局冇見過佢喎！」

文、攝：追蹤組