李思捷變身「正印」 誓奪杏兒芳心
胡杏兒在劇集《換樂無窮》中因沉迷「以物易物」網站而引發身份危機，無啦啦由屋邨師奶「升呢」千億新抱，導致與「老公」李思捷婚姻現危機。現實生活中，杏兒渴望換取「藍莓」劉俐的完美身形，思捷則希望化身杏兒男友黃宗澤（Bosco），換取「杏」福生活！
出爐視后胡杏兒與「扮嘢王」李思捷在新劇《換樂無窮》中首度合演夫妻，雖然劇集被安排於長假密集的農曆新年檔期上映，但杏兒不擔心拖低收視，更睇好思捷成為新一代師奶殺手：「思捷做小男人好可愛，加上題材新鮮兼感人，對收視有信心o架！」她表示在劇中透過「以物易物」網站與李詩韻交換身份，霎眼間由「屋邨師奶」變成「千億新抱」，但最終因「換唔番」而引起軒然大波，可謂貪出禍！
不想拍糟質戲
問到現實生活中最想與誰交換身份？思捷笑說：「我要做Bosco（黃宗澤）！等杏兒唔使開工就約佢去街，哈哈！」他自爆在拍攝期間亦當杏兒如「老婆」般又呵又氹，可惜當現實「正印」Bosco出現便立即「奪回」杏兒的芳心。至於杏兒則渴望做男人：「我想做李思捷，好似佢咁搞笑！」並指日後不想再拍糟質自己的戲：「我為呢套劇試過畀梘液噴面，又試過拍浸浴戲搞到皮膚敏感，所以都係想拍番『正劇』多啲。」
欲換劉俐身形
假如現實中有「以物易物」網站，杏兒希望換得如「藍莓」劉俐般的model身形：「佢手腳好瘦，又有線條，我就冇喇！」思捷則向「換物」say no：「咪制！拍完呢套劇就知教訓太大，死都唔換。（換視帝獎座？）換咗都無謂，係你就係你啦！」
採訪：阿彭 攝影：沈健程
場地：皇家太平洋酒店
髮型：Aaron@Hair Culture
化妝：Cyrus@Beauty Tech
服飾：Vivienne Tam、Temporis