蔡楓華：我仲係偶像派
紅館開演唱會一直都是蔡楓華（Ken）的心願，眼前多年來對他不離不棄的粉絲，仍然會送他公仔，教Ken感動在心，同時他也沾沾自喜，因為粉絲的舉動令他明白：「原來我仲係偶像派！」
我可以出番嚟唱歌，甚至去紅館開演唱會，真係要好多謝我班歌迷，咁多年來對我不離不棄，真係好難得。全香港都知道我負面新聞不斷，以我一個咁夠經驗嘅人嚟睇，都知道蔡楓華好難翻身，但我歌迷冇理會呢啲嘢，真係好感動。佢哋對我係無私，佢哋唔計有冇報酬，總之能夠做到就去做，甚至冇錢幫我去做宣傳都去做。
我真係估唔到依家仲好似偶像派咁，收啲好得意嘅公仔，歌迷仍然如昔日咁對我，哈哈！所以我依家出嚟都要young look啲，原來我仲係偶像派。
其實開演唱會並唔係今年或者下年嘅事，早喺1988年已經有機會去紅館，當年已簽咗五場，都係張耀榮先生幫我搞。但點解最後胎死腹中，係因為當時唱片公司冇幫我出隻唱片，結果最後連演唱會都冇做到。
到2000年我返嚟，亦都好想做，但都係冇做到。其實發生好多嘢，但真係唔想講，係一個好大遺憾。依家2012年真係可以成事，好似發咗一場夢，呢個夢唔只係一個夢想，係我同歌迷嘅一個心願，今次紅館個唱並唔係一個終結，而係一個開始，我要喺紅館開演唱會，係一定要達到，我知道好多人都希望我好，所以會全力以赴去做好佢。
否認「大牌」
我記得之前上《勁歌金曲》，記者叫我出來問演唱會嘅嘢，但我冇出到，唔係因為我大牌，而係因為未成事，都未動筆，真係唔知答記者係定唔係。我依家可以答你，去紅館我已經Ready，真係唔怕，唱歌對我嚟講有十足把握，唯一考驗到我，係點樣去面對四面台，對做開三邊台嘅我嚟講，係一個好大挑戰。
口述：蔡楓華 筆錄：專案組