馬浚偉心淡 3月離無綫
有傳無綫小生馬浚偉因與無綫鬧不和而欲提前解約，據知他昨晨返回電視城與高層商討去留問題，並成功提早「跳船」。馬浚偉事後接受電話訪問時坦承曾「入城」，而高層樂易玲更證實他將鐵定於3月解約，正式結束與無綫18年的賓主關係。
歌手出身的馬浚偉，94年因高層曾勵珍提攜而加盟無綫，迄今已効力18年，可惜劇集不時被安排在「炮灰檔」推出，提名視帝亦鋪鋪「食白果」，加上無綫早前阻止他接拍內地劇集搵人仔，令他心灰意冷，欲提前解約還「自由身」。雖然期間有傳「六嬸」方逸華要點名挽留他，但他仍不肯「就範」，更拒絕在大型活動上與傳不和的高層樂易玲合照，令「跳船」傳聞更囂塵上。
與高層密斟
據可靠消息指，馬浚偉昨晨返回電視城洽談解約一事，一眾高層亦罕有「蒲頭」招呼，他隨即到一名高層辦公室密斟半小時，最終如願以償提前解約，告別18年「TVBuddy」的生涯。本報記者就事件致電馬浚偉，他坦承昨晨曾現身電視城，但拒談是否成功解約：「呢啲嘢遲啲先講，我只可以講，目前同無綫仲係愉快咁傾緊呢件事！」
樂易玲證實
至於樂易玲透過電話訪問說：「馬浚偉今朝（昨晨）係返過嚟，同公司傾提早解約問題。其實佢份約要今年5月先到期，但佢要求提前到3月完約，無綫已經接納咗！公司之前都幫佢接咗工作，佢亦承諾會履行，至於文件細節就交咗畀法律部跟進。」