模特兒趙嘉懿（Carrie）昨日與囝囝Marcus現身商場，她透露最近辭退了家中外籍女傭，改由自己湊囝囝，她說：「我發現之前嘅女傭偷錢，仲偷咗我哋嘅信去財務公司借錢，至少有四間財務公司打電話嚟收數，佢又向同鄉借錢，早幾日有個外傭同我講，佢同幾個同鄉借咗九萬蚊畀我個女傭，但就一直冇還錢亦冇覆電話。」
Carrie坦言經過今次事件後，本來不打算再請外傭，但捱了一星期沒有女傭的日子已大感吃不消：「我湊咗Marcus一個星期已經覺得好攰，又要做家務，真係好忙碌，雖然攰得嚟好開心，但都決定要再請人，希望請到個好人啦！」
