莊思華孖妹同炒車 邪！

若要數近期「黑仔王」，非莊思華（Mona）和莊思明（Lisa）兩姊妹莫屬，Lisa新車落地的FIAT 500 BY GUCCI上周已慘食兩張牛肉乾（違例泊車），Mona昨晚駕駛同一架車途經獅子山隧道時，前車突然慢駛，Mona煞掣不及遭後面的士猛地一撞，結果三車撞成一團，的士車頭蓋更撞到摺起。

慶幸座駕夠晒硬淨

幸而Mona傷勢沒有大礙，她在電話時說：「真係好險呀，前面架車突然耷停，後面架的士收唔切掣，我就夾喺中間囉！好彩傷勢唔嚴重，只係撞親隻腳，架車就後面個揼把撞爛晒，聽日（今日）就會去落口供，會拖架車去整！」她亦於微博寫道：「我想我已經小心到不得了……好彩架車仔真係夠硬淨！」

入院兩小時冇人理

在Mona撞車的同時，原來Lisa正於主題公園玩碰碰車，最邪係Lisa玩碰碰車都可以Chok親，幸而沒有大礙，難怪大家姐莊思敏亦高呼好邪，她表示今年已經還神，但可能未到新一年的拜神時間，因而兩位妹妹都出事。談到Mona傷勢，思敏說：「佢白車入公立醫院，等兩個鐘都冇人理囉，Mona見只係隻腳腫咗，就氣沖沖咁走囉！」

此外，思敏的公司近日人事變動，連帶工作也相應減少，近日只專注電台工作及錄影《姊妹淘》，思敏為精益求精，請來靚聲王洪朝豐教她發音，她說：「我把聲比較老牛，咪請佢教我囉，佢真係好Nice，依家講嘢真係好咗！」

文：專案組　採：名人組