林保怡冇約入榜無綫（火羅）爆
無約一身輕的林保怡，最近憑《天與地》片尾曲《年少無知》無厘頭打入1月6日的《勁歌》金榜，保怡破格入榜，據監製解釋是想幫劇集宣傳，但明顯慢幾拍，保怡則自誇前無古人，威水爆燈！事實上，《天與地》被喻為神劇，引起全港熱話，警世金句跟Rock N'Roll一樣never die！無綫不敵群眾壓力，更破例將29集劇集重新放上網任睇。
已與無綫沒有合約的林保怡，跟陳豪及黃德斌在《天》劇唱片尾曲《年少無知》唱到街知巷聞，一句「如果，命運能選擇」唱出大眾心聲，早前已在網上頒獎禮成功贏得民意大獎，可惜一樣不被「自己友」無綫重視，冇份爭《勁歌金曲》獎項，有網友更寸爆指《年少無知》比林峯的《Chok》更應奪金曲金獎！
監製認遲來的宣傳
雖然《年》曲與勁歌獎項無緣，不過在1月6日的《勁歌》金榜中卻發現此曲的名字，更一上榜即打入第五位！向來金榜只接受有合約的歌手，但林保怡已跟無綫「各行各路」，歌曲仍能入榜可算破例。記者訪問《勁歌》監製麥鎮東時他亦承認此舉犯規，故只會讓此曲上榜一星期：「大家唔好咁敏感，因為係三個星期前已安排好錄影，原意係幫套劇宣傳。（部劇都播完喇喎！）的確係遲咗。」其實《年少無知》早於上月初已打入叱咤903二十大，再證明無綫慢過豬油的後知後覺作風！
至於林保怡笑言榮獲無綫為他破例，算是前無古人，又寸爆表示「都要講聲多謝」：「真係唔知邊處鄉村邊處例，不過證明有啲轉變，係好事嚟嘅。（話想幫《天》劇宣傳！）都播完，仲宣咩傳吖！個個都計到幾時完o架啦。」他透露雖簽下大國豐臣經理人合約，但仍可拍TVB劇，問到會否參與《金枝慾孽II》？他表示樂易玲曾邀約，他亦曾保留檔期，但之後冇人跟進，故不會再理會。
群眾壓力最後勝利
《天與地》由戚其義監製、周旭明編審的拍攝手法破格，被譽為無綫鮮有的神劇，雖然趕走師奶觀眾，收視不濟，但播出以來一直話題不斷，更因食人主題及疑似有政治隱喻而遭內地封殺。但劇集愈封、網民愈給力，最後一集大結局終於衝破收視低迷厄運，網上世界亦好評如潮，如今《天》劇雖已播完，但金句及經典場面仍為人津津樂道，鑑於群眾壓力，早前無綫破天荒將全劇29集重新放上myTV網讓觀眾重溫。
文：影視組