林文龍傾掂等開工 撐新老細派對
林文龍、周家怡、李雨陽等多位前任及現役無綫藝人，前晚亮相「電訊魔童」王維基旗下電訊公司員工聖誕派對，提早為明年才正式踏足電視業的王維基撐場打氣。
林文龍前晚出席於九龍灣展貿舉行的城市電訊員工聖誕派對，談到與城電合作進展，他說：「大致上傾好，要睇劇本同時間，至知具體開工日期。（同郭可盈夫妻檔拍劇？）太太唔拍喇，佢主力湊BB，由我負責搵奶粉錢。（想生龍B？）睇上天安排啦！」
與佘詩曼情同姊妹的周家怡單拖現身，她說：「阿佘喺內地拍嘢，我好耐冇出席呢種員工party，好興奮！（傳阿佘同鄭嘉穎翻撻？）冇聽佢提起，我同阿佘感情都冇着落，呢個聖誕互相關心。」
魔童否認財困
李雨陽與無綫明年四月約滿，他說：「我出席周年晚宴啫！無綫冇咁小器嘅！（問過樂易玲至出席？）我哋孤兒仔，唔使問！」
心情勁靚的王維基說：「今晚請咗好多藝人出席，有部分嚟咗，好多仲開緊工幫隔籬台拍嘢。（有冇聯絡陳志雲？）我哋不嬲都係friend嚟！（有傳你公司財困？）廢話！公司今年成績係record of the year！我忠告傳呢啲嘢嘅人，聖誕快樂！」
文：影視組