葉世榮擺酒唔請兄弟

樂隊班霸Beyond成員葉世榮感情生活一直低調，去年曾在北京被影到有新女友，惟他卻支吾以對。昨日世榮的內地經理人公司才在微博上載聲明，指世榮將於2011年12月27日結婚，沒透露新娘身份和婚禮地點。

家強詐晒型

據知，自拆夥後轉戰大陸的世榮，新娘亦是大陸圈外人，兩人早已註冊，將於後日在北京補擺喜酒，由於世榮已將發展重心放在大陸，連昔日隊友家強和Paul都沒有通知，似乎不好意思打搞朋友，雖然還有三日就結婚，但世榮昨仍忙於𢱑銀，現身濟南做聖誕騷，惟至截稿前未回覆，而內地歌手王黎男在微博上載兩人合照及世榮喜帖，指生日獲世榮夫婦請吃大餐，另有網上消息指，早前世榮到新加坡演出時，被網友目睹他跟女友影婚紗相。

家強對世榮結婚一事全不知情，他接受電話訪問愕然說：「好突然，真係唔知喎，咁急嘅。」家強還笑說：「我覺得自己好核突，搞錯呀！結婚都唔單聲，（有冇見過佢女友？）我連擺酒都唔知，點會見過。」問幾耐冇見世榮？他說：「6月家駒忌辰喺省善真堂碰過一次，但冇問拍拖嘢。」家強扮完「詐型」後，即衷心恭喜好兄弟：「希望佢開心，快啲有BB，陪我啲小朋友玩，我諗佢遲啲會補請我哋飲。（想唔想Paul都結婚？）等緊佢呀。」

Paul未有計劃

而Paul同樣不知世榮結婚，他說：「冇收到通知喎，哈哈哈，佢份人好文靜同內斂，可能唔想咁多人知。（有冇嬲佢唔通知兄弟？）唔會，傻啦，近年佢成日唔喺香港，雖然我哋少見，但唔代表唔friend，希望佢日日都咁開心，婚姻美滿。（幾時到你？）遲啲先，未有計劃。」

文：音樂組