莊思敏姊妹同心要家人見證
莊思敏和莊思明兩姊妹感情要好，基本上可謂無所不談，但對感情事，為了保護另一半以免家人留下壞印象，若在情路上遇到不開心，都偏向選擇不說出來。而兩人對婚禮都各有要求，但一定要有至親在場，莊思敏稱只要遇上心目中的Mr.Right，更有機會閃婚。
J：莊思敏 L：莊思明
唔介意被偷拍
J：點解你想入娛樂圈？
L：細個試過幕前演出，十七歲時做過Sam Hui（許冠傑）演唱會嘅Sam's Angels，知道成個流程，覺得好得意。其實唔理係幕前定幕後，我都有興趣，例如想試下做編劇。不過我識嘅嘢有限，所以我想去進修。我知你十幾歲已經立下決心要做Model。
J：我細細個係想做心理醫生同律師，因為可以知道人哋好多故事，我鍾意接觸人。
L：咁點解會做咗Model？
J：因為細個成日寒背同埋打籃球個人好粗魯，媽咪就叫我去學Catwalk，後嚟有機會做Model就試下喇，之前唔知呢行係做咩，試咗之後就發覺同我想做嘅嘢好接近，可以認識同接觸好多人。
L：入咗行同我想像中差唔多，畀人偷拍都慣咗，最緊要影得我靚啲。
J：呢方面我OK，私隱對我嚟講唔係太重要，我既然喺公眾地方做得嘅嘢都唔會唔畀得人知。諗番起細個時好少同你傾偈，因為年紀相差得遠，到你哋十幾歲時先開始傾多咗，呢幾年就最好傾，最Friend。我記得你選美時都有問我意見，你初初係想做歌手，之後就想演戲，跟住又想做Model，我話做咩都唔緊要，淨係唔畀你做o靚模。
兩姊妹唔比較
L：雖然家姐你都係做呢行，但我唔會同你比較，因為我哋兩個係唔同個體，形象、性格都唔同。
J：我好多嘢都會同你講，感情都會講，不過當我未有任何一個決定前係唔會同屋企人講，如果我嘅另一半對我唔好，又或者同佢有咩唔開心，我都唔會第一時間同屋企人講，同屋企人呻，我唔想你哋對我嘅另一半有唔好嘅印象。
L：我都唔會刻意問，我知你遲早會忍唔住，總會講嘅。其實感情方面我自己都好少講，尤其是唔開心嘅嘢，唔到好無助都唔敢同屋企人講，原因同你一樣，都係唔想有咩事會令到屋企人對我另一半有唔好嘅印象。
J：就算知道你另一半對你唔好都唔會逼你哋分手，你哋喺埋一齊實有原因，我會尊重你。之前都會擔心，但唔擔心得咁多，唯有同你分析下。我都會八卦你啲緋聞。
L：我會對屋企人坦白。
J：我有見過個男仔，印象OK。公開戀情有好有唔好，公開咗會輕鬆啲舒服啲，不過又要同外界交代，唔知會一齊幾耐，好難講，就算公開都要Stable咗先講。
L：我唔係刻意唔公開，但係唔想成日提感情。都畀人影咗咁多次，心照啦，自己諗下啦，唔想講咁多。我想早啲結婚，唔想同啲小朋友有代溝，如果我搵到一個我願意同佢走埋下半生嘅人，我隨時都Ready結婚。
J：我要到男友求婚嗰一刻先知嗰個人係咪可以付託終身，我隨時都可以結，睇嗰個人幾時出現，唔排除閃婚。
擇偶拒揀蠢人
L：我結婚一定要有儀式，最少要有屋企人見證住，一定要影婚紗相。
J：我都係最緊要有屋企人在場，擺酒反而唔係最重要。至於生BB嘅Concern要大啲，要睇所有環境配合，唔係話生就生。
L：我好鍾意小朋友，可以對住成日，仔女都無所謂。我都可以介紹男仔畀你，但要再留意下先。
J：我嘅擇偶條件係要大過我，思想要成熟過我，佢喺工作上要強過我，我好怕人蠢。
文：名人組
攝：謝國華